ONM- ABO Bitootessa 18, 2024
Ministirri Muummee Israa’el Beeniyaamin Netaaniyaahuun qeeqa idil-addunyaa mormuun haleellaa Raafaa keessatti banuuf kutannoo qaban irra deebi’anii mirkaneessaniiru.
Magaalattiin lammiilee Faalasxiinotaa kutaalee Gaazaa biroo irraa gara miliyoona 1.5 ta’an kanneen baqannaa barbaadaniin guutamtee jirti.
Yaadni isaa kun kan kenname yeroo Chaansilarri Jarmanii, imala Baha Giddu Galeessaa irratti, karoora kana mormuu isaanii irra deebi’anii ibsanitti.
Garuu Mr Netaaniyaahuun ”dhiibbaan idil-addunyaa kamiyyuu Israa’el kaayyoo waraanaa ishee hunda galmaan akka hin geenye hin dhorku” jedhan.
Mr Netaaniyaahuun walgahii kaabinee isaanii irratti, ”waraannicha kaayyoo isaa hunda galmaan gahuun dura amma yoo dhaabne, hiikni isaa Israa’el waraana kana mo’amtee turte jechuudha, kanas hin hayyamnu,” jedhan.
Israa’el waraana ishee itti fufuu danda’uu qabdi jedhan, kaayyoon isaas Hamas dhabamsiisuu, namoota booji’aman hunda gadhiisuu fi Gaazaan ”kana booda balaa akka hin geessisne” mirkaneessuu qaba.
“Kana gochuuf ammoo Raafaa keessattis ni hojjenna.”
Hoogganaan Israa’el kun Wiixata har’aa Chaansilara Jarman Olaf Scholz waliin wal arguuf kan jiru yoo ta’u, Chaansilara Jarman Olaf Scholz hojii Raafaa irratti akeekkachiisa kennan irra deebi’anii ni kennu jedhamee eegama.
Karoorri Israa’el hawaasni addunyaatiin akka malee qeeqamaa kan ture yoo ta’u, UN fi US haleellaan guutuu Rafaah keessatti raawwatamu balaa geessisuu akka danda’us akeekkachiisaniiru.
Pirezidaantiin Ameerikaa Baayiden Israa’el weerara magaalattii keessatti babal’isuu akka hin qabne akeekkachiisanii, “sarara diimaa” jechuun waamuun isaanii ni yaadatama.
Kanas ta’e sana, waajjirri Mr Netaaniyaahuu karoora hojii waraanaa Rafaah keessatti gaggeeffamuuf karoorfame Jimaata darbe kan raggaasise yoo ta’u, raayyaan ittisa biyyaa lammiilee nagaa baasuuf qophaa’aa akka jiru ibseera.
Muummichi ministeeraa yaada kana ”guutumaan guututti sirrii miti” jechuun qeequun, kanaa mannaa ”irree Hamaas” kuffisuuf hojjechuu qabu jedhan jechuun BBCn gabaaseera.
