ONM-ABO Adoolessa 9, 2025
Waajjirri mirga namoomaa Dhaabbata Mootummoota Gamtoomanii Kibxata kaleessaa akka jedhetti, ajjeechaan dhiheenya kana mormii guutuu biyyattii Keeniyaa keessatti geggeeffameen, akkasumas saamichaa fi qabeenya barbadeessuun ”gadi fageenyaan akka isa dhiphise” ibseera.
Dubbi himaan Raaviinaa Shamdasanii Jenevaatti ibsa gaazexeessitootaaf kennaniin akka jedhanitti, humnoonni nageenyaa mormii “hokkaraa” magaalaa guddoo Naayiroobii fi yoo xiqqaate kaawuntii 16 biroo keessatti ka’eef , rasaasa ajjeesaa, rasaasa laastikaa, gaazii imimmaanessuu fi qawwee bishaanii fayyadamuudhaan deebii kennaniiru.
Itti dabaluudhaanis, “Taateewwan yeroo dhiyoo kunniin erga mormitoonni 15 ajjeefamanii fi hedduun isaanii madaa’uu isaanii gabaafamee torban lama qofa booda ta’uun isaanii baay’ee yaaddessaadha,” jechuun dabalteetti.
“Komishinarri Olaanaan Mirgoota Namoomaa Dhaabbata Mootummoota Gamtoomanii Volker Turk waamicha isaa tasgabbii fi of qabuu, akkasumas bilisummaa yaada ofii ibsachuu, waldaa fi karaa nagaa walga’uu guutummaatti akka kabajamu haaromsa.
Komiin seera qabeessa hundee mormii kanaa ta’e furmaata argachuun murteessaadha,” jette. Shamdasanii poolisiin taateewwan kanaan dura raawwataman irratti qorannoo akka beeksise eereera: “Komishinarri olaanaan ajjeechaa gabaafamee fi sarbamiinsa fi sarbama seera mirga namoomaa idil-addunyaa jedhame kanneen biroo, humna fayyadamuu dabalatee, hatattamaan, gadi fageenyaan, of danda’ee fi iftoominaan akka qorataman waamicha isaa irra deebi’ee ibsa.”
“Namoonni itti gaafatamummaa fudhatan itti gaafatamuu qabu,” jechuun, seera mirga namoomaa idil-addunyaa jalatti, qawwee dhukaasaa dabalatee, humni itti yaadanii ajjeesuu qondaaltota seera kabachiisan, lubbuu balaa dhiyeenya dhufu irraa eeguuf yeroo cimsee barbaachisaa ta’etti qofa fayyadamuu akka qabu jala sararaniiru.
“Waajjirri keenya qorannoowwan gaggeeffaman dabalatee, qormaata kana furuuf aanga’oota Keeniyaa deeggaruuf qophiidha,” jette. Keeniyaan hiriira guutuu biyyattii irratti gaggeeffameen yoo xiqqaate namoonni 10 du’uu fi namoonni 29 madaa’uu isaanii Komishiniin Mirgoota Namoomaa Biyyoolessaa Keeniyaa Wiixata darbe beeksiseera.
