ONM-ABO Onkoloolessa 20, 2023
Saamichi daangaa hin qabne hawaasa godina lixa Shaggar aanaa Daawoo keessatti saamtota firaan wal ijaaraniin raawwachaa turuu gabaasaa kan turre yoo ta’u, kaabinoonni aanichaas firaan wal ijaaranii aanaa Daawoo gandoota 23 qabdu keessaa maqaa bu’uuraalee misoomaa isiniif galchinaan hawaasa saamaa turuu jiraattotni himatu.
Margaa Nadhasaa bulchaa aanaa, Masarat Mul’ataa itti aanaa bulchaa aanaa, Addunyaa Tafarraa itti Gaafatamaa waajjira paartii, Damisee Taaddalaa itti aanaa waajjira eegumsa fayyaa godina kibba lixa Shaggar, Caalaa Taliilaa abbaa adeemsa bittaa, Tasfaayee Margaa, abbaa adeemsa karoora baajataa fi Seefuu Mulgeetaa itti gaafatamaa waajjira maallaqa, (MMD) warreen jedhamantu maallaqicha addaan hiratan jechuun jiraattotni dubbatu.
Warreen maqaan isaanii armaan olitti heerame kunneen maallaqa kana maqaa hanqina bu’uuraalee misoomaa qabna nuuf haa kennamu jedhuun kan fudhatan yoo ta’u, maallaqichas dantaa dhuunfaa isaaniif akka oolfatan himu.
Saamtonni kunneenis gareen wal ijaaranii saamaa waan turaniif yeroo ammaa ammoo irratti wal dhabuun akka wal basaasaa jiraniis dubbatu.
Maallaqa saaman kanaanis tokkoo tokkoon isaanii lafa magaalaa gurguddoo akka Finfinnee fi Adaamaadha ittiin bitatanii jirus jechuun, yeroo ammaas iccitiin isaanii hawaasa baldhaa bira ga’uun hawaasis gungumaa jiraachuu irraan kan ka’e gara hidhaaf wal saaxiluu bira ga’aanii jirus jechuun Arraata Biyyoolessa Oromiyaatti himan.
