Saree ta’e hin jiraadhu
Leencumaa ta’een du’a
Dhugaa sabakoon barbadaa
Hin dhuguu burqaa gu’aa
Jedhanii falma seenani
Falma dhugaa fi haqaa
Yomumaa irraa goraanii
Isuma dhugaa waaqaa
Karaa haqaas malee
Hin deemnu karaa raqaa
Irbu goototaa gannee
Hin nyaanu waadaa sabaa
Mucaa gandas jettanii
Nun waaminaa tasumaa
Nuti ilmaan ganda mitii
Nuti Oromoodha dhuguma
Sanyii keenyaatu tokko
Nuu waliirraa dhalannee
Haadhoo waliif taanee
Wajjiiniin jiraanne
Kanaaf adda hin baanu
Haadhoo gara tokkotii
Oromoo taane dhalanne
Nuti mucaa gandas miti
Jedhanii waadaa galanii
Waadaa irbuu Shinniggaa
Magaarsaa Barii fi
Yiggazuu Bantiifaa
Waliif amanamanii
Tokkummaa lallabanii
Irree garboomsaa sanas
Fiincilanii didanii
Kutaa fi amantii hin qabnu
Oromoo taane banee
Wal qoonnees qofaa hin gallu
Walumaan dhumna malee
Oromoo taanee banee
Soomaalee taane hin gallu
Irbuu shinniggaa gannee
Wal qoqqoonnee hin bullu
Yoo dhumne waliin dhumna
Yoo jiraannes waliinii
Nuti Oromoon tokkodha
Haa badu qoqqooddanii
Jedhanii didaanii
Gammoojjii gaafa Soomaalee
Qabsoo isaanii galmaan ga’anii
Kanammoo maaltu caalee
Tokkummaadhaan duuna
Tasaa wal hin buusnuu
Boollumaa tokkotti
Nuu awwallaa isinuu
Dura dhaabbatanii
Akkasiin falmanii
Diina gandoomsaa sanaaf
Lubbu isaanii kennanii
Kanaaf xurree dhiigaan
Siidaa nuuf ijaarani
Oromoo tokkomsuudhaaf
Lubbuu isaanii laatani
Jaarreen kana keessaa
Eenyuufaa wamuu laata
Dhaddachoo Boruu fi
Falmataa Cacabsaa
Kana qofas mitii
Goototni hedduudha
Maqaa isaanii waamneef malee
Shinnigaan ragaadha
Boollaa tokkotti fincoofnee
Gurmuudhan waliin yaanaa
Shira ormaa cabsinee
Nu Oromoo tokko taana
Dhaamsa nuuf dabarsanii
Gootummaa nu barsiisanii
Isaa gara bilisummaatti
Geessu xurree nu agarsiisani
Kanaaf tokko taanee
Waliis jabeeffanna
Iddoo rakkoon jirutti
Waliillee gorfaanna
Wal dhiiba hambisnee
Jibbaa balaaleffanna
Diina tokkummaa keenyaa
wal wajjiniin falmanna
Malee hin dhageenyuu
Gandoomsaaf garboomsaa
Hiddaa isaa gogsinaa
Isaa furmaanni isaa ×2
Oromoodha jechuun
Himan maqaa keenya
Waanta biraas hin qabnu
Tokkummaadhaan wal dhageenya
Siidaa hin jignee dhaabanii
warri seenaa utubaani
Tokkummaa lalaabanii
Warri Oromoo tokkoomsani
Qoosaa fi taphaan mitii
Aarsaa hedduudhaan dhufee
Isaa tifkachuu qabna
Nuti dhaloonni qubee
Malee hin diignu galmicha
Jibbaa fi summii facaafnee
Seenaan bor maal nuun jedha
Yoo akka hin taane taane
Warra irbuu Shinniggaa
Dhugaan tokkummaa labse
Rakkoo jirtu hundumaasaa
Dha’ee gootummaan cabse
Kanaaf nus hin jigsinu
Kan goototni dhaabanii
Dhiiga isaanii cobsanii
Kan isaan katabaani
Nuti dhaloonni har’aas
Galmicha jabeessina
Waadaa isaanii fudhannee
Gandomsaa ittiin cabsiina
Dhaggeeffataa fi daawwataa Arraata Biyyoolessa Oromiyaa
Fedhii Bilisummaa irraa
WARRA SHINNIGGAA, DIRREE QABSOO fi FALMAA IRRATTI LUBBUU ISAANII DHABAN HUNDAAF HAA TA’U!
BAGA EBLA 15 GUYYAA GOOTOTA OROMOO GEESSAN.