ONM-ABO Waxabajjii 4, 2024
Prezdaantiin Ameerikaa Joo Baayiden waliigaltee dhukaasa dhaabuu Gaazaatti Israa’el waliin taasifamuuf gufuu kan ta’e Hamaas qofa ta’uu Amiira Kaataar Sheek Tamiim Bin Hamad Al Taaniitti himanii, garuun kun kana akka fudhatu dhiibbaa akka godhu dhaamaniiru.
Baayiden “amma Hamaas dhukaasa guutuu dhaabuuf gufuu qofa ta’uu mirkaneessaniiru.” “Israa’el ammoo gara fuulduraatti tarkaanfachuuf qophii ta’uu ishee mirkaneessaniiru” jechuun Waayit Haawus waamicha hoggantoota lamaan gidduutti Wiixata kaleessaa taasiseen ibseera.
Kaataaritti Amiir Diwaan Sheek Taamiim pirezidaantii Ameerikaa irraa waamichi “tattaaffii dhukaasa dhaabuu dhaabbataa Gaazaa irra ga’uuf godhamu irratti mari’achuuf” akka isaan qaqqabe mirkaneessaniiru.
Itti dabaluudhaanis hoggantoonni lamaan “misooma Gaazaa fi naannoo Falasxiin qabame” irratti mari’ataniiru.
Kaataar Masrii fi Ameerikaa waliin haasaa al-kallattiin Hamaas fi Israa’el gidduutti taasifamu gidduu seenuun gahee olaanaa taphatteetti.
Yaadni dhukaasa dhaabuu kun karoora marsaa sadii kan of keessatti hammate yoo ta’u, booji’amtoota Israa’el hidhamtoota Falasxiinotaaf jijjiiruu, humnoota Israa’el Gaazaa keessaa baasuu fi naannoo diigame deebisee ijaaruu kan of keessatti hammateedha.
Yaadni dhihaate kun Hamaas aangoo irra akka hin turre kan dhorku yoo ta’u, kunis gareen kun irra deddeebiin kuffiseera.
Gamtaan biyyoota guddatan G7 Wiixata kaleessaa yaada kana akka deggere ibsuun Hamas akka fudhatu gaafateera.
Waajjirri Miidiyaa Mootummaa Gaazaa Wiixata kaleessaa akka jedhetti, Israa’el gargaarsa baay’ee barbaachisu Gaazaa akka hin seenne haalaan daangessuu itti fufteetti, hanqina nyaataa, dabalata soorataa fi talaalliitiin daa’imman umriin isaanii waggaa shanii gadi ta’e 3,500 ol balaa du’uuf saaxilamaniiru jechuun Aljeeziraan gabaaseera.
