ONM-ABO Waxabajjii 20, 2024
Humnoonni Israa’el irra deddeebiin seera waraanaa cabsuu fi waldhabdee Gaazaa keessatti namoota nagaa fi loltoota adda baasuu dadhabuu akka danda’an waajjirri mirga namoomaa Mootummoota Gamtoomanii Roobii kaleessaa ibseera.
Addatti ammoo itti gaafatamaan qorannoo U.N. waraanni Israa’el Falasxiinota “balleessuu” raawwachuu isaa himate.
Gabaasa haleellaa Israa’el ja’aa kan lubbuu namoota hedduu galaafatee fi bu’uuraalee misoomaa siiviilii barbadeesse irratti baaseen waajjirri mirga namoomaa U.N. (OHCHR) humnoonni Israa’el “sirnaan qajeeltoowwan addaan baafamuu, walmadaaluu fi of eeggannoo haleellaa keessatti raawwataman cabsuu danda’u” jedheera.
“Ulaagaa malaa fi mala waraanaa miidhaa siiviilii irraa fagaatu ykn yoo xiqqaate hanga hundaan xiqqeessuu filachuun duula boombii Israa’el keessatti yeroo hunda kan sarbame fakkaata,” jedhan Komishinara Olaanaan Mirgoota Namoomaa U.N. Volker Turk.
Ergamaan dhaabbataa Israa’el Mootummoota Gamtoomaniitti Jenevaatti qabdu xiinxala kana ”dhugaa, seeraa fi malaan dogoggora qaba” jechuun kuffiseera.
Walgahii addaa Mana Maree Mirgoota Namoomaa Mootummoota Gamtoomanii Jenevaatti taa’een, itti gaafatamaan Komishinii Qorannoo Mootummoota Gamtoomanii, Navi Pillay, namoonni waldhabdee kana keessatti miidhaa raawwatan seeraan dhiyaachuu qabu jedhan.
Gabaasa torban darbe maxxanfame irraa argannoowwan hidhattoonni Hamaas fi Israa’el lamaan isaanii yakka waraanaa raawwachuu isaanii irra deebitee kan ibsite yoo ta’u, seera idil-addunyaatiin miidhaa hamaa “yakka dhala namaa irratti raawwatame” jedhamuun beekamuuf Israa’el qofti itti gaafatamummaa akka qabdu dubbatteetti.
Yeroon ammaa kasaaraa namoota siiviilii Falasxiin ” dhabamsiisuu” akka ta’e dubbatteetti.
Qorannoo kanaaf kan hin tumsinee fi loogii farra Israa’el kan himattu Israa’el, haadha nama booji’amee bakka ishee buufattee akka dubbattu filachuun, booji’amtoota Hamaas Onkoloolessa keessa fudhateef xiyyeeffannoo barbaachisaa hin kennine jechuun gabaasa kana qeeqxe.
“Waan caalu isaaniif gochuu dandeenya. Namoonni booji’aman nu barbaadu,” jechuun haati booji’amtuu ganna 23 Romi Gonen kan taate Meirav Gonen iyyannoo imimmaan dhangalaasuun dubbatteetti jechuun Rooyitars gabaaseera.
