ONM-ABO Adoolessa 1, 2024 Jilli
Taalibaan Dilbata kaleessaa walga’ii Mootummoota Gamtoomaniin durfamu Kaataar keessatti Afgaanistaan irraa hirmaate.
Walga’iin guyyoota lamaaf turu kun rakkoo Afgaanistaan magaalaa guddoo Kaataar Dohaatti walga’ii U.N.n qophaa’e isa sadaffaadha.
Dubbi himaan olaanaa mootummaa Taalibaan kan jila sana hoogganu Zabihullah Mujahid waltajjii miidiyaa hawaasaa X irratti akka barreessetti jilli kun walga’ii kana cinatti bakka bu’oota biyyoota Raashiyaa, Hindii fi Uzbeekistaan dabalatee waliin wal arga jedhan.
Taalibaan Hagayya 2021 aangoo kan qabate, humnoonni U.S fi NATO waraana waggoota kurnan lamaa booda biyyattii keessaa ba’uu isaanii torban dhumaa keessa ture.
Biyyi kamiyyuu Taalibaan mootummaa Afgaanistaan ta’uu isaa ifatti beekamtii kennite hin jirtu.
U.N. ammoo uggurri barnootaa fi hojii dubartootaa osoo jiruu beekamtii kennuun hin danda’amu jechuun dubbatee ture.
Mujaahid Sanbata darbe magaalaa guddoo Kaabuul keessatti gaazexeessitootaaf ibsa kennaniin, jilli kun gara Dohaa deemaa jira “hubannoo barbaaduu fi dhimmoota furuuf” jedhan.
“Biyyoonni hundi yeroo rakkisaa keessatti uummata Afgaanistaan akka hin dhiisne, akkasumas Afgaanistaan deebisanii ijaaruu fi dinagdee cimsuu keessatti dammaqinaan akka hirmaatan gaafanna,” jedhan.
Daangaa idil-addunyaa sirna faayinaansii fi baankii Afgaanistaan irratti kaa’ame, qormaata damee dhuunfaa guddisuu fi tarkaanfii mootummaan daldala qoricha sammuu namaa hadoochu irratti fudhatu dabalatee dhimmoota irratti akka mari’atan himaniiru.
Kanaan dura Afgaanistaan keessatti qondaalli olaanaa Mootummoota Gamtoomanii Roozaa Otunbayeva walga’ii Dohaatti gaggeeffame irratti dubartoota Afgaanistaan hammachuu dhabuu isaanii falmuun gaaffiin mirga dubartootaa ka’uun isaa mirkanaa’aa ta’uu cimsanii dubbataniiru jechuun France 24 gabaaseera.
