ONM-ABO Adoolessa 17, 2024
Ministirri Dhimma Alaa Turkii Hakaan Fidaan Kibxata kaleessaa hogganaa biiroo siyaasaa Hamaas Ismaa’eel Haniyeh waliin waa’ee rakkoo gargaarsa namoomaa Gaazaa keessatti deemaa jiruu fi marii dhukaasa dhaabuu yeroo dhiyootti taasifamaa jiru ilaalchisee bilbilaan mari’achuu maddeen dippilomaasii mul’isan jechuun miidiyaaleen teessoon isaanii Turkii ta’e ibsaa jiru.
Haasaa kana irratti Fidaan haala balaa namoomaa Gaazaa fi guddina beelaa fi dhukkuboota kaaba Gaazaa keessatti dabalaa dhufe ilaalchisee ibsaniiru.
Dabalataanis, Fidaan fi Haniyyaan marii dhukaasa dhaabuu Israa’el waliin taasifame irratti haala yeroo dhiyootti mul’ate irratti mari’ataniiru.
Murtee Mana Maree Nageenyaa Mootummoota Gamtoomanii dhukaasa hatattamaan akka dhaabbatu gaafatu kan cabsite Israa’el erga Onkoloolessa 7, 2023 haleellaa Hamaas raawwateen booda haleellaa gara jabinaa Gaazaa irratti raawwatte itti fufee jiruun balaaleffannaa idil-addunyaa ishee mudateera.
Ergasii lammiileen Falasxiin 38,700 ol kan ajjeefaman yoo ta’u, irra caalaan isaanii dubartootaa fi daa’imman yoo ta’u, 89,000 ol ammoo madaa’uu isaanii aanga’oonni fayyaa naannoo sanaa himaniiru.
Haleellaa Israa’el erga raawwatte ji’oota sagal keessatti, lafti bal’aan Gaazaa uggura nyaataa, bishaan qulqulluu fi hanqina qoricha mudate gidduutti diigamee jira.
Israa’el Mana Murtii Haqaa Idil-addunyaatti duguuggaa sanyiitiin kan himatamte yoo ta’u, murtiin isaa inni dhiyoon magaalaa kibba Raafaa keessatti hojii waraanaa ishee hatattamaan akka dhaabdu ajajeera. Bakki kun iddoo Falasxiinoonni miliyoona 1 ol ta’an Caamsaa 6 weerara Israa’el bakkichatti goote dura itti baqatan ture jechuun miidiyaaleen Turkii gabaasaniiru.
