ONM-ABO Adoolessa 30, 2024
Lammiileen Naayijeeriyaa rakkoo gatii jireenyaa dhaloota tokko keessatti hammaataa ta’e keessatti mormii guyyoota 10’f labsan.
Ameerikaa, Yunaayitid Kingidam fi Kaanaadaan rakkina dinagdee fi baasii dabalaa jiruun mormii karoorfame dura Naayijeeriyaaf akeekkachiisa imala kennaniiru.
Waajjirri Dhimma Alaa UK Adoolessa 29 hanga Hagayya 10’tti balaan jeequmsi uumamuu akka danda’u ibsuun, ”mormiin darbe akeekkachiisa xiqqoo malee gara jeequmsaatti jijjiirame” jechuun hubachiiseera.
Mootummaan Kaanaadaa mormiin kun ”yeroo kamiyyuu gara jeequmsaatti jijjiiramuu akka danda’us” akeekkachiiseera.
Gama biraatiin Imbaasiin Ameerikaa Abujaatti argamu lammiileen Ameerikaa namoota walitti qabamuu fi hiriira irraa akka of qusatan gorseera.
Naayijeeriyaan dhaloota tokko keessatti rakkoo gatii jireenyaa isa hamaa keessa jirti.
Ji’a Waxabajjii keessa qaala’iinsi jireenyaa %34.19 yoo ta’u, qaala’iinsi nyaataa ammoo gara %40.87 ol akka ol guddate Biiroon Istaatistiksii Biyyaalessaa Naayijeeriyaa ibseera.
Deggartoonnis ta’e mormitoonni mormii kanaa karoora gibira meeshaalee barbaachisoo irratti kaffalamu mormuun mormii dhiheenya kana Keeniyaa keessatti geggeeffame waliin wal bira qabanii ilaalaniiru.
Dubbi himaan ittisaa Meejar Jeneraal Edwaard Buubaa gaazexeessitootaaf akka himanitti, ”Lammiileen karaa nagaa mormuuf mirga qabaatanis, jeequmsaaf socho’uu fi shororkeessummaa gadi lakkisuuf mirga hin qaban,” jedhan.
Garuu hoggantoonni mormitootaa tokko tokko kan akka Atiku Abubakar kan Paartii Dimokiraatawaa Ummatootaa akka jedhanitti, “mormiin karaa nagaa” akka itti fufuuf mootummaan nageenya kennuu qaba jedhan.
“Mirgoota kana ukkaamsuuf yaaliin godhamu kamiyyuu heera mootummaa kan faallessu qofa osoo hin taane kallattiin dimokiraasii keenya arrabsuudha,” jechuun Abubakar torban darbe miidiyaa hawaasaa irratti dubbachuu Doochii Waleen gabaaseera.
