ONM-ABO Fulbaana 23, 2024
Masriin lammiileen ishee naannoo Somaaliyaa irraa kan adda baatee Somaaleelaandii dafeenii akka gadhiisan Dilbata kaleessaa waamicha dhiheessite.
“Dhiibbaa haalli nageenyaa tasgabbaa’aa hin taane nageenya isaanii irratti qabu ilaalcha keessa galchuun, lammiileen Masrii hundi gara naannoo Somaliland akka hin imalle gaafanna,” jechuun Imbaasiin Masrii Somaaliyaa jiru ibsa kenneen hubachiiseera.
Imbaasichi lammiileen Masrii naannicha keessa jiran karaa buufata xiyyaaraa Hargeyisaa akka ba’an kan gaafate yoo ta’u, haalli nageenyaa amma jiru lammiilee Masrii achi jiraniif gargaarsa qoonsilaa akka hin kennine kan daangessu ta’uu cimsee ibseera.
Akkasumas lammiileen Masrii naannoo Rippabiliika Federaalaa Somaaliyaa kamiyyuu daawwachuuf karoorfatan “dambiiwwan aanga’oonni Somaaliyaa dhimmi ilaallatu kaa’an guutummaatti akka eeganiif” gaafateera.
Tarkaanfiin kun kan fudhatame mootummaan Somaliland dhiheenya kana mana kitaabaa Masrii naannoo ishee keessa jiru cufuuf murtee dabarsee hordofee, hojjettoonni ishee naannicha akka gadhiisan gaafate jedha gabaasni miidiyaalee Arabaa.
Bara 1991 Somaaliyaa irraa walabummaa erga labsitee booda beekamtii seeraa kan hin arganne Somaalilaandiin akka qaama bulchiinsaa, siyaasaa fi nageenyaa walabaatti kan hojjettu yoo ta’u, mootummaan giddugaleessaa naannicha irratti to’annoo mirkaneessuu hin danda’u.
Itoophiyaan ammajjii 1, 2024 Somaliland waliin waliigaltee mallatteessuu ishee hordofee waldhabdeen Somaaliyaa fi Itiyoophiyaa gidduutti uumame, kunis buufata waraanaa Itoophiyaa fi liizii buufata doonii Berbera Galaana Diimaa irratti waggaa 50f karaa saaqu, mormiin mudachaa jira.
Pirojektii hidha laga Abbayyaa irratti hojjettu ilaalchisee Itoophiyaa waliin waldhabdee mataa ishee kan qabdu Masris waliigaltee kana ni mormite.
Ji’a Hagayyaa keessa pirezidaantiin Masrii Somaaliyaa waliin pirootokoolii tumsa waraanaa mallatteessee, abbaa biyyummaa isheef deeggarsa cimsee ibsuun, dhimma keessoo ishee keessa seenuu kamiyyuu diduu isaa beeksiseera.
Miidiyaaleen Somaaliyaas dhufaatii loltoonni Masrii qaama humnoota nagaa eegsisuu idil-addunyaa ta’uun Moqaadishootti dhufuu isaanii, Masriin osoo hin mirkaneessin gabaasuun, Itoophiyaa keessatti yaaddoo uumeera jechuun Anaadooluun gabaaseera.
