ONM-ABO Muddee 18, 2024
Haleellaan xiyyaaraa guddaan Israa’el Kibxata kaleessaa maatii bal’aa mana jireenyaa kutaalee Kaaba Gaazaa lama keessatti argaman kan ajjeese yoo ta’u, taankiin kibbaa ammoo gara naannoo gargaarsa namoomaa qarqara galaanaa Meditiraaniyaanii jirutti dhiibuun maatiin buqqa’an ammas deebi’anii akka buqqa’an dirqisiiseera.
Ogeeyyiin fayyaa akka jedhanitti, haleellaa xiyyaaraan mana Magaalaa Gaazaa naannoo Daraj jedhamutti raawwatameen gamoo kan barbadeessee fi manneen naannoo sana jiran miidhuun yoo xiqqaate namoonni 10 du’uun isaanii mirkanaa’eera.
Gara kaabaattis magaalaa Beyit Lahiya jedhamtu kan jalqaba Onkoloolessaa irraa eegalee goolama Israa’el jala turte keessatti yoo xiqqaate namoonni 15 caccabaa mana haleellaa qilleensaatiin naannoo galaanaatti rukutame jalatti du’uu ykn dhabamuu isaanii ogeeyyiin fayyaa himaniiru.
Namoonni baraarsaan lakkoofsa namoota du’an mirkaneessuuf bakka sana gahuu hin dandeenye.
Haleellaa adda addaa magaalaa Gaazaa fi Beet Lahiyaa bakka biraatti raawwatameen yoo xiqqaate lammiileen Falasxiin biroo 10 ajjeefamaniiru jedhan ogeeyyiin fayyaa.
Haleellaa Kibxata kaleessaa raawwate ilaalchisee yaadni waraana Israa’el irraa hatattamaan hin kennamne jechuun Arabs news gabaaseera.
