ONM-ABO Gurraandhala 10, 2025
Aangawoonni Liibiyaa reeffa gara 50tti siqan awwaalota jumlaa lama gammoojjii kibba baha biyyattii keessa jiran keessaa argame. Kunis ,balaa yeroo dhiyoo namoota karaa biyya Kaaba Afrikaatiin Awurooppaa ga’uuf barbaadan hirmaachise keessatti mul’isan.
Daarektoreetiin nageenyaa ibsa Dilbata kaleessaa baaseen akka jedhetti, awwaalli jumlaa tokko Jimaata darbe qonna magaalaa kibba baha Kufraa keessatti argate reeffa 19 of keessaa qaba.
Kufraatti itti gaafatamaan mana maree nageenyaa Mohaammad Al-Fadeyil akka jedhanitti, awwaalli jumlaa lammataa yoo xiqqaate reeffa 30 qabus magaalattii keessatti argameera. Kunis kan argame erga aanga’oonni wiirtuu tursiisa godaantootaa sakatta’anii booda.
Dhaabbanni tola ooltummaa godaantotaa fi baqattoota Bahaa fi Kibba Liibiyaa gargaaru Al-Abreen namoonni awwaala jumlaa keessatti argaman tokko tokko osoo hin awwaalamin rasaasaan rukutamee ajjeefamuu dubbataniiru.
Awwaalli jumlaa reeffa koolu galtootaa of keessaa qabu kanaan dura Liibiyaa keessatti kan argame yoo ta’u, kunis godaantota Afrikaa fi Baha Giddu Galeessaa irraa dhufaniif bakka qaxxaamuraa guddaa ta’ee gara Awurooppaatti geessuuf yaalaa ture.
Bara darbe aanga’oonni reeffa godaantota 65 naannoo Shuyrif, kibba magaalaa guddoo Tiriipooliitti argamu irraa qotanii turan.
Daldaltoonni namaa waggoota kurnan oliif tasgabbii dhabuu irraa fayyadamoo ta’uun godaantotaa fi baqattoota biyyoota 6 kanneen daangaa biyyattii waliin qaban Chaad, Niijar, Sudaan, Gibxii, Aljeeriyaa fi Tuuniziyaa irraa daddabarsu.
Biyyattiin bara 2011tti hogganaa Liibiyaa Muaammar Gadaafii kufuu fi ajjeefamuu hordofuun jeequmsa keessa galte. Sabni boba’aan badhaate kun waggoota kurnan darban keessaa harka caalu mootummoota morkattootaa Bahaa fi Dhihaa Liibiyaa bulaa jirti jechuun Aljazeeraan gabaaseera.
