ONM-ABO Bitootessa 10, 2025
Loltoonni Taalibaan Paakistaan naannoo daangaa kaaba dhihaa buufata sakatta’iinsa nageenyaatti haleellaa raawwataniin yoo xiqqaate loltoonni waraana gargaaraa Paakistaan afur ajjeefamuu isaanii qondaalli poolisii Dilbata kaleessaa ibseera.
Haleellaan kun kan raawwatame aanaa Kurram, daangaa Afgaanistaan irratti argamtu, bulchiinsa Kaayber Pakatunkawa keessatti yoo ta’u, waggoota dhiyoo asitti naannoo sanatti hookkarri baay’achaa dhufeera.
Erga Taalibaan Afgaanistaan Hagayya 2021 Kaabuulitti aangootti deebi’anii as Paakistaan keessatti jeequmsi dabaleera.
Taalibaan Paakistaan – Tehreek-e-Taliban Pakistan (TTP) jedhamuun beekamu — garee hidhattoota naannoo kaaba dhihaatti sochii guddaa taasisanii fi yeroo hunda humnoota nageenyaa irratti xiyyeeffataniidha.
Islaamaabaad bulchitoonni Kaabuul hidhattoota dachee Afgaanistaan irratti gaaddisa godhatanii Paakistaan irratti haleellaa raawwatan hundee irraa buqqisuu dhabuu isaanii yoo himattu, Afgaanistaan himannaa mootummaan Taalibaan kana ni haalti.
Torban darbe godinuma kana aanaa Baannu keessatti bade balleessaan boombii konkolaataa lamaan mooraa waraanaa keessa oofuun namoonni nagaa 13 fi loltoonni shan ajjeefamaniiru jechuun AFP’n gabaaseera.
