ONM-ABO Sadaasa 15, 2025
Ameerikaa fi Kooriyaan Kibbaa waliigaltee daldalaa damee ijaarsa doonii Ameerikaa irratti invastimantii Kooriyaa doolaara biiliyoona 150 of keessaa qabu bal’inaan kan ibsan yoo ta’u, biyyoonni lamaan doonii bishaan jalaa humna niwukilaraa hojjetan ijaaruu irratti “gara fuulduraatti tarkaanfachuuf” waliigalaniiru.
Waliigaltee kanaan, Pirezidaantiin Lii Jaye Miyung Jimaata akka jedhanitti, Kooriyaan Kibbaa qaama tumsa haaraa Waashingitan waliin ijaarsa doonii, sammuu namtolchee fi indaastirii niwukilaraa irratti taasifteen doonii bishaan jalaa humna niwukilaraa hojjetan akka ijaartu himaniiru.
Ragaan Waayit Haawus baase akka ibsutti, Ameerikaan Siyool doonii bishaan jalaa humna niwukilaraan hojjetu akka ijaartu hayyama kan kennite yoo ta’u, Kooriyaan Kibbaa ijaarsa doonii doolaara biiliyoona 150 dabalatee damee industirii Ameerikaa irratti doolaara biiliyoona 200 dabalataa akka invast gootu ibseera.
Dhaabbanni oduu Kooriyaa Kibbaa Yonhap akka jedhetti invastimantiin Siyool goote, Waashingitan taarifa daldalaa meeshaalee Kooriyaa irratti kaffaltu dhibbeentaa 25 irraa gara dhibbeentaa 15tti gadi buusuun isheef deebii ta’uu ibseera.
“Jijjiiramoota gurguddoo dinagdee fi nageenya keenyaaf ta’an keessaa tokko – mariin biyyoota lamaanii daldala, taarifaa fi nageenya irratti taasifamu – xumurameera,” jechuun Pirezidaanti Liin Jimaata kaleessaa ibsa gaazexeessitootaaf kennaniin ibsuun, biyyoonni lamaan “dooniiwwan bishaan jalaa humna niwukilaraa hojjetan ijaaruu irratti gara fuulduraatti tarkaanfachuuf” waliigaluu isaanii ibsaniiru.
”Ameerikaan Rippabiliik Kooriyaa doonii bishaan jalaa haleellaa niwukilaraa hojjetu akka ijaaruuf hayyama kenniteetti,” jedhan Liin.
Kooriyaan Kibbaa dabalataanis “aangoo keenya badhaadhina yuuraaniyeemii fi boba’aa irra deebiin hojjechuu irratti babal’isuuf deggarsa” argatteetti jedhan jechuun Al Jazeeraan gabaaseera.
