ONM-ABO Amajjii 13, 2024
Hiriira fi konsartii deggartoonni alaabaa mirmirsan kumaatamaan lakkaa’aman lammiileen Taayiwaan guyyaa kaleessaa irratti hirmaatan qophii filannoo Sanbata har’aa pirezidaantii fi mana maree seera baastuu haaraa filachuuf taasisanii dha.
Filannaa bara kana Taayiwaan taasistu keessatti Chaayinaan odola ofiin of bulchituuf qormaata taati yaadi jedhu dhaga’amaa jira.
Dorgommiin kun cimaa waan ta’eef, Chaayinaa fi michuu ijoo Taayiwaan kan taate Ameerikaan lamaan isaanii iyyuu dhimmoota siyaasaa fi dinagdee filattotaa irratti dhiibbaa ni taasisu.
Filannoon kun itti aanaa pirezidaantii Lai Ching-te, kan paartii tarkaanfataa dimokiraatawaa DPP jedhamuun beekamu bakka bu’uun, Hou Yu-ih kan paartii mormituu guddaa Nationalist Party, Kuomintang ykn KMT jedhamuunis beekamu, fi kantiibaa magaalaa guddoo duraanii Taipei, Ko Wen-je, kan Paartii uummata Taayiwaan gidduutti geggeeffamuu dha.
Laayiin magaalaa dhaloota isaanii Taayinaan kibba odola kanaa keessatti haasawa taasisaniin, sababa qorannoo misaa’elaa fi shaakala waraanaa Chaayinaan filannoo pirezidaantii banaa jalqabaa bara 1996 dura filattota Taayiwaan sodaachisuuf kaayyeffate irraa kan ka’e maaliif hojii ogeessa baqaqsanii hodhuu isaa akka dhiise yaadachiiseera.
Paartii TPP’s kan bakka bu’e Ko’n Jimaata kaleessaa ibsa gaazexeessitootaaf kennaniin akka jedhanitti, madaallii Taayiwaan fi U.S. gidduutti hariiroo Chaayinaa waliin qaban hin jeeqne kaayyeffatan.
“U.S. biyya addunyaa irratti humna guddaa qabduu fi michuu Taayiwaan ishee barbaachistuu dha,” jedhan. “Kanaaf eenyullee haa filatamu hariiroon Taayiwaan fi U.S. gidduu jiru hin jijjiiramu” jedhan.
Chaayinaan filannoo pirezidaantummaa fi seera baastootaa Taayiwaan geggeeffamuu keessatti kaadhimamaa dantaa Chaayinaaf hojjetu akka darbu kan feetu yoo ta’u, sababa kanaanis irra deddeebiin Taayiwaan akka qaama isheetti ibsachaa jirti.
Filannoo Taayiwaan guyyaa har’aa geggeeffamu ilaalchisee Pirezidaantiin US Ameerikaa Joo Baayideen Chaayinaa akka kabajju pirezidaantii Shiin Jinping itti himanii turuu Associated Press dabalatee miidiyaaleen adda addaa gabaasaa turan.
