ONM-ABO Amajjii 27, 2024
Dhaabbileen Musliimaa idil-addunyaa fi biyyoonni Arabaa murtii duraa Manni Murtii Haqaa Idil-addunyaa (ICJ) kan qaamni haqaa teessoo isaa Heeg godhate weerara Israa’el uummata Falasxiin Gaazaa irratti raawwatte irratti ceephoo guddaa kenne simataniiru.
Manni murtichaa Israa’el hojii ishee akka dhaabdu ajajuu irraa kan hin dhaabanne yoo ta’u, dhimma Afrikaan Kibbaa dhiheessuun murtoo barbaaddu hundi deebii hin arganne. Harki caalaan paanaalii ICJ namoota 17 qabu Israa’el du’aa fi miidhaa haleellaa waraanaa isheetiin dhufu daangessuuf akka carraaqxu gaafachuun dhukaasuu garuu hin ajajne.
Barreessaan olaanaa Mana Maree Tumsa Galoo Galaanaa (GCC) Jasem Mohammad Albudaiwi ibsa kennaniin, “Murtiin Mana Murtii Haqaa Idil-addunyaa seerotaa fi waliigalteewwan idil-addunyaa eegumsa lammiilee nagaa qulqulluu waliin walqabatan waliin kan walsimuudha,” jedhan.
Albudaiwi akka jedhanitti Israa’el “dhaabbilee fi hospitaalota siiviilii irratti xiyyeeffachuun, kunis lammiilee nagaa qulqulluu kuma kudhaniin lakkaa’aman Gaazaa keessatti ajjeefamuu fi madaa’uu fide” Konveenshinii Ittisaa fi Adabbii Yakka Duguuggaa Sanyii cabsiteetti jedhan.
Hanga Jimaataatti haleellaan Israa’el Falasxiinota 26,000 ol ajjeesuu, Gaazaa baay’ee barbadeessee, namoota ishee miliyoona 2.3 keessaa gara dhibbeentaa 85 qe’ee isaanii irraa ari’uu ministeerri fayyaa Falasxiin Gaazaa ibseera.
Dhaabbanni Tumsa Islaamaa (OIC) kan biyyoota Musliimaa 57 addunyaa guutuu irraa haammate, murtiin kun “gocha duguuggaa sanyii dabalataa fi miidhaan uummata Falasxiin Gaazaa irratti akka hin raawwatamne ittisuuf” akka gargaaru cimsee ibseera.
Ibsa OIC kunneen, qaamoleen dhimmi ilaallatu hundi “Israa’el murtii ICJ guutummaatti fi hatattamaan akka eegdu akka mirkaneessan” gaafateera.
Haa ta’u malee Israa’el murtii kana kan kuffiste yoo ta’u, muummichi ministeeraa Beeniyaamin Netaaniyaahuun waraana kana akka itti fufan dhaadataniiru. ”Biyya keenya ittisuuf, uummata keenya ittisuuf waan barbaachisu hojjachuu itti fufna,” jechuun televijiiniin dubbataniiru.
Qondaaltonni Israa’el paanaalii ICJtti akka himanitti haleellaan kun hidhattoota Hamas duukaa deemuun tarkaanfii fudhachuu qofa malee uummata Falasxiin irratti xiyyeeffachuuf kan yaadame miti jechuun gabaasni Arab News ganama kana qabatee ba’e ni addeessa.
