ONM-ABO Muddee 3, 2024
Waraanni U.S. haleellaa dhuma torban darbee Joordaan keessatti loltoota U.S. sadii ajjeeseef haaloo ba’uuf, Jimaata kaleessaa haleellaa xiyyaaraa Iraaq fi Siiriyaa keessatti bakka 85 ol kanneen Eegdota Warraaqsa Iraan (IRGC) fi milishoota isheen deggaraman waliin hidhata qaban irratti bane.
Haleellaan kun xiyyaarota boombii fageenya dheeraa B-1 U.S. irraa balali’an fayyadamuu kan dabalatu yoo ta’u, bulchiinsi prezidaant Joo Baayiden haleellaa hidhattoota Iraaniin deeggaramaniin raawwatameef deebii sadarkaa hedduu qabu kan jalqabaa kennuu yoo ta’u, hojiin waraanaa U.S. guyyoota itti aanaan keessatti dabalataan ni raawwatama jedhamee eegama.
Haleellaan U.S. bakkeewwan Iraan keessa jiran irratti kan hin xiyyeeffanne yoo ta’u, Israa’el hidhattoota Falasxiin Hamaas waliin Gaazaa keessatti lola ji’a sadii oliif geggeessite irraa kan ka’e waldhabdeen Baha Giddu Galeessaa daran akka hammaate agarsiisa.
Waraanni U.S. ibsa kenneen akka jedhetti haleellaan kun wiirtuuwwan ajajaa fi to’annoo, bakka kuusaa rookkeettii, misaa’elaa fi diroonii, akkasumas dhaabbilee dhiyeessii loojistikii fi meeshaa waraanaa dabalatee xiyyeeffannoon irratti raawwatameera.
Humnoonni U.S bakkeewwan torba kan haleelan yoo ta’u, kunis afur Siiriyaa fi sadii Iraaq keessaa bakka 85 ol kan rukutuu waraanni kun beeksiseera.
Haleellaan kun Raayyaa Quds – qaama basaasaa fi waraana gartokkee IRGC kan milishaa michuu isaa guutuu Baha Giddugaleessaa, Libaanos irraa kaasee hanga Iraaq fi Yaman irraa hanga Siiriyaa irratti dhiibbaa guddaa geessisu irratti xiyyeeffate.
Daarektarri Hojjetoota Waliinii U.S. Letenaant Jeneraal Daaglaas Siims haleellaan kun milkaa’aa fakkaata, boombiin kun meeshaa hidhattootaa rukutamee dho’iinsa sadarkaa lammaffaa gurguddaa kan kaase ta’us, hidhattoonni ajjeefaman jiraachuu isaanii ifa hin taane.
Garuu Siims itti dabaluudhaan haleellaan fudhatame kanaan namoota dhaabbilee kanneen kana keessa turan irra miidhaan qaamaa ga’uu akka hin oolle dubbataniiru.
Miidiyaaleen mootummaa Siiriyaa Jimaata kaleessaa akka jedhanitti, “weerara Ameerikaa” bakkeewwan naannoo gammoojjii ishee fi daangaa Siiriyaa fi Iraaq irratti raawwatameen lubbuu namoota hedduu darbuu fi miidhaan irra gaheera jedhan.
Waraanni Iraaq haleellaan kun naannoo daangaa Iraaq keessatti akka ta’e ibsuun, tasgabbii dhabuu naannichatti dabaluu akka danda’u akeekkachiiseera.
Dubbi himaan waraana Iraaq Yahya Rasool ibsa kennaniin, “haleellaan qilleensaa kun mirga abbaa biyyummaa Iraaq cabsuu, tattaaffii mootummaa Iraaq kan laamshessuu yoo ta’u, balaa Iraaq fi naannicha gara bu’aa hamaa keessa galchuu danda’u fiduu danda’a” jechuu isaanii Rooyitars ganama har’aa gabaaseera.
