ONM-ABO Ebla 26, 2024
Murni bilxiginnaa uummata dirqamaan qabuun leenjii milishummaa fudhachiisaa jiru, Baha Wallaggaa aanaa Limmuu keessaa Ebla 24, 2024 gandoota aanichaa lama ganda Mukarbaa Diimaa fi ganda Sapheera Meexxii jedhaman keessatti hawaasa hunda jaarsaa fi jaartii, dhiiraa fi dhalaa, xiqqaa fi guddaa, fayyaa fi dhukkubsataa osoo hin jenne dirqamaan baasanii leenjisaa jiraachuun barameera.
Oduu biraatiin ammoo ona Guutoo Giddaa keessatti namoonni shan Ebla 23, 2024 waraana shiftaa Abiy Ahimediin kan ajjeefaman yoo ta’u, namootni kunis ganda Qajeelaa jedhamu irraa dargaggoo Magarsaa Kibiruu, ganda Eebbaa keessaa, Yohaannis Ittafaa Wiirtuu fi Iyyaasuu Geetuu Bantii kanneen jedhamanii fi namoota lama ammoo maqaa akkuma arganneen kan isin beeksisnu ta’a.
Oduu hidhaan wal-qabatuun ammoo aanaa Haroo Limmuu ganda Hoomii Kalaalaa keessaa hawaasa nagaa hidhuun itti fufuun Ebla 24, 2024 waraanni faashistii PP maqaa sakatta’insa WBO’n bobba’an namoota nagaa maqaan isaanii: Lammii Yaadataa, Maammoo Fayyisaa, Mul’ataa Maaruu, Geexee Qanaatee, Taaddaluu Tashoomaa fi kanneen maqaan nu hin geenye biroon magaalaa aanichaa Harootti hidhamanii hiraarfamaa jiraachuun beekameera.
