ONM-ABO Adoolessa 27, 2024
Dhaabbanni Fayyaa Addunyaa erga vaayirasichi saamuda bishaan xuraa’aa keessatti argamee booda daa’imman akka hin qabamneef torban dhufan keessatti akka kennamuuf talaallii pooliyoo miliyoona tokkoo ol gara Gaazaatti ergaa jira jedhan hogganaan isaa Jimaata kaleessaa.
“Hanga ammaatti dhimmi pooliyoo galmaa’ee osoo jiruu, tarkaanfii hatattamaa malee, daa’imman kumaatamaan lakkaa’aman kanneen eegumsa malee hafan bira ga’uun isaa dhimma yeroo qofa,” jechuun Daarektarri Olaanaa Teediroos Adhanoom yaada gaazexaa Biriteen The Guardian ‘f ibsan.
Daa’imman umuriin isaanii waggaa shanii gadi ta’e dhukkuba vaayirasii kanaaf baay’ee akka saaxilaman kan barreesse yoo ta’u, keessumaa daa’imman umuriin isaanii waggaa lamaa gadi ta’e erga duula talaallii idilee waldhabdee ji’oota sagal ol ta’een addaan citeera.
Poliyomyelitis, kan baayyinaan karaa manca’aa-afaaniin kan babal’atu yoo ta’u, vaayirasii daddarbaa guddaa qabuu fi sirna narvii weeraree laamsha’uu fiduu danda’uudha.
Duula talaallii jumlaa kanaan bara 1988 irraa eegalee addunyaa irratti dhibbeentaa 99n hir’ateera, guutummaatti dhabamsiisuuf tattaaffiin taasifamaa jira.
Waraanni Israa’el Dilbata darbe loltoota Gaazaa keessatti tajaajilaniif talaallii pooliyoo dhiyeessuu akka jalqabu ibsee ture. Kunis erga hafteen vaayirasichaa saamuda qorannoo naannoo sana keessatti argamee booda.
Pooliyoo malees, UN torban darbe haalli qulqullinaa Gaazaa keessatti hammaataa dhufuun, balfi xuraa’aan namoota buqqa’aniif naannoo mooraa tokko tokkootti daandii irratti dhangala’uu isaatiin, namoonni dhukkuba Hepatitis A, dhibee garaachaa bal’inaan dabaluu isaanii gabaaseera.
