ONM-ABO Muddee 11, 2024
Murna Bilxiginnaan deggaramuun goleewwan Oromiyaa keessatti ijaarsa isaanii cimsatan hidhattootni Finxaaleeyyii Amaaraa Faannoo jechuun of waaman ilmaan Oromoo haala suukkaneessaan ajjeesuu fi madeessuu godina Wallootti jabeessanii itti fufan.
Muddee 10, 2024 aanaa Harxummaa Fursee iddoo addaa Maganxaa Karra Qorii jedhamutti hidhattootni Finxaaleeyyii Amaaraa Faannoon daandii cina riphanii eeguun dhukaasa namoota konkolaataa miil-sadee (baajaajiin) magaalaa Caffaa Roobit irraa gara ganda Shaashoo imalaa turan irratti bananiin nama maqaan isaa Sayid Aliyyii Hamzaa jedhamu haala suukkaneessaan yoo ajjeesan, namoota lama ammoo kan maqaan isaanii Mahaammad Hasan Umar fi Adam Aliyyii jedhaman madeessaniiru.
Jiraattotni nagaan humnoota Finxaaleeyyii Amaaraa Faannootiin osoo imala irra jiranii haleellaan irratti raawwatameen madaa’an lamaan yeroo ammaa magaalaa Caffaa Roobititti yaalamaa kan jiranii fi madoon isaanii illee cimaa ta’uu jiraattotni dabaluun ONM’tti himaniiru.
