ONM-ABO Muddee 30, 2024
Aanaa Saasiggaa bakkeewwan adda addaatti ergamtoonni Bilxiginnaa jiraattota dararuu hammeessuun, ganda Haroo Folaa jedhamu keessaa “waardiyyaa halkanii eegaa” jechuun rakkisaa jiraachuu fi namoota eegumsa ba’uu didanis hidhaatti guuraa kan jiran ta’uu jiraattonni Arraata Biyyoolessa Oromiyaatti himanii jiru.
Kanumaan wal qabatee Muddee 27, 2024 abbootii warraa maqaan isaanii:
- Obbo Geetanaa Dabalaa,
- Obbo Taaddalee Wodaajoo fi
- Obbo Iddoosaa Qinaaxxii jedhaman
badii tokko malee eegumsa halkanii ba’uu haftan sababa jedhuun waajjira gandaa Haroo Folaatti guyyaa tokko guutuu hidhanii garmalee hiraarsaa turuu maddeen itti dabaluun eeraniiru.
Gandicha keessaa namoota hedduu fedhii isaanii malee dirqamaan milishummaa leenjisuun meeshaa itti hidhuun yeroo ammaa kanas hidhattoonni kunneen gara itti deebi’an dhabuun rakkachaa kan jiran ta’uunis ibsameera.
