ONM-ABO Amajjii 21, 2025
Pireezidaantiin Ameerikaa filatamaan Doonaald Traamp sirna kakaa isaanii Wiixata kaleessaa booda rakkina bulchiinsa Baayiden aangoo gadhiisaa jiru sirreessuuf saffisaan tarkaanfii akka fudhatan waadaa galaniiru.
Waggoota dheeraa afur kufaatii Ameerikaa irratti golgaan cufamee guyyaa haaraa humnaa fi badhaadhina Ameerikaa, kabajaa fi boonsa Ameerikaa jalqabna, hunda isaa al tokko deebifna,hundaaf,” jechuun Tiraamp jala bultii pirezidaantii US 47ffaa ta’uun eebbifamuu isaanii irratti Wiixata hiriira Waashingitan D.C.tti taasisaniin dubbataniiru.
Tiraamp fi itti aanaan pirezidaantii filataman J. D. Vaans hiriira kana irratti haasaa osoo hin kennin dura awwaala loltuu hin beekamne bakka awwaalchaa biyyoolessaa Arlingiton Virginiyaa keessatti argamutti sirna faaya kaa’uu irratti hirmaatan.
Itti dabaluudhaanis, “Bulchiinsa dhaabbata siyaasaa Waashingitan keessatti fashalaa’ee fi malaammaltummaadhaan guutame, bulchiinsa fashalaa’e xumuruuf jirra,” jedhan.
Tiraamp waggoota afran dhufaniif lammiilee Ameerikaatiif akka falmanis waadaa galaniiru.
“Kun seenaa Ameerikaa keessatti sochii siyaasaa guddaa yoo ta’u, guyyoota 75 dura, injifannoo siyaasaa biyyi keenya argite keessaa isa guddaa galmeessineerra,” jedhan.
“Boru irraa eegalee saffisaa fi humna seena qabeessa ta’een socho’ee rakkoo biyya keenya mudate hunda sirreessa” jedhan.
Bulchiinsi haaraan kun naannoo abbaa biyyummaa Ameerikaa fi daangaa ishee irratti ”dafee” akka deebi’ee to’atu Tiraamp cimsanii dubbataniiru.
Gara waliigaltee dhukaasa dhaabuu Israa’elii fi garee diddaa Falasxiin Hamas gidduutti taasifameetti yoo deebi’an, Tiraamp waliigaltee dhukaasa dhaabuu “epic” jechuun tarkaanfii jalqabaa nagaa waaraa Baha Giddugaleessaa keessatti akka uumamu dubbataniiru.
Traamp lola Yukireen keessatti gaggeeffamaa jiru xumuruu, jeequmsa Baha Giddugaleessaa keessa jiru dhaabuu fi Waraanni Addunyaa Sadaffaan akka hin mudanne ittisuuf fedhii qabanis irra deebi’anii ibsaniiru jechuun BBC’n gabaaseera.
