ONM-ABO Ebla 16, 2025
Godina Arsii Bahaa aanaa Sirkaa ganda Eleellee Walaanaa iddoo addaa Xuullee jedhamu keessatti dargaggoo maqaan isaa Ukkaashaa Haashim Haajii jedhamu maqaa sobaa waraana bilisummaa Oromoo waliin hariiroo qabda jedhu itti maxxansuun gaaffii seeraa tokko malee mana isaatii gadi baasanii maatii isaa duratti rasaasa itti roobsuun ajjeessanii hallayyaatti gatuu maddeen Arraata Biyyoolessa Oromiyaaf addeessanii jiru.
Kana malees ganduma kana keessatti hawaasa nagaa siyaasa kamiin Keessaa qooda hin qabne namoota maqaan isaanii:
- Obbo Adam Abdullaahii fi
- dargaggoo Araboo Adam
jedhaman mana isaaniitii qabuun of duukaa buusanii sakattaa WBO’f bobba’uun, yoo waraanni bilisummaa Oromoo qawwee nutti dhukaase nuti immoo isin ajjeefna jechuun erga doorsisaa turaniin booda fuudhanii gandoota baadiyyaa hunda irraan deemaa jiraachuus maddeen itti dabaluun ONM’f ifoomsanii jiru.
Haaluma wal fakkaatuun aanaa Roobee Diida’aa ganda Jeenaa Gadamsaa irraas dargaggoo maqaan isaa Doktooruu Jibriil jedhamu mana maatii isaatii ukkaamsuun gaaffii tokko malee qawwee itti qabanii gandoota baadiyaa irra ittiin deemaa jiraachuu fi namoota hedduus ganda kana irraa mana hidhaatti guuranii hiraarsaa jiraachuu jiraattonni naannichaa Arraata Biyyoolessa Oromiyaatti himaniiru.
Namoota hidhamanii hiraarfamaa jiran keessaa muraasni maqaan nu ga’e:
- Maammad-amiin Haaji-Amaan;
- Sheek Adam Haaji-Amaan,
- Hiisaa Jeeyluu,
- Kamaal Gannaan,
- Jibriil Jeeyluu
kanneen jedhaman yoo ta’u, lukkeelee sirnichaan qe’ee isaanii irraa qabamanii baadiyyaa irraa naannessuun yeroo ammaa waajjira poolisii aanaa Roobee Diidaa Keessatti hidhanii hiraarsaa jiraachuun ifoomeera.
