ONM-ABO Waxabajjii 18, 2025
Chaayinaan Kibxata kaleessaa pirezidaantiin US Ameerikaa Doonaald Traamp waldhabdee Iraanii fi Israa’el gidduutti uumame irratti “boba’aa dhangalaase” jechuun himatte. Himannaan Chaayinaa kunis erga hogganaan Ameerikaa kun jiraattonni Teehiraan “hatattamaan akka baqatan” akeekkachiisuu isaaniin kan dhufeedha.
Wal gaarreffannaa waggoota kurnan lamaan darbanii fi waraana gaaddidduu yeroo dheeraa booda, Israa’el torban darbe duula qilleensaa ajaa’ibaa xiyyeeffannoo qabu guutuu Iraan irratti kan geggeessite yoo ta’u, Israa’el Iraan meeshaa atoomiikii akka hin arganneef kaayyeffattee hojjechaa jiraachuun barameera.
Diinummaan wal waldhabdee bal’aa kaasee fi Tiraamp haleellaa Israa’el marii niwukilaraa itti fufee jiru daandii irraa maqsee booda Iraan gara minjaala mariitti akka deebitu gaafataniiru.
Traamp waltajjii hawaasummaa dhugaa isaanii irrattis akeekkachiisa addaa kennaniiru: “Namni hundi battalumatti Teeyraanii ba’u qaba!”
Dubbi himaan Ministeera Dhimma Alaa Chaayinaa Gu’o Ji’aakuun waa’ee dubbii Tiraamp akkas jedhan: “Abidda jabeessuu, boba’aa dhangalaasuun, doorsisa uumuu fi dhiibbaan olka’aa ta’e haala kana tasgabbeessuuf hin gargaaru, garuu walitti bu’iinsa kana cimsuu fi bal’isuu danda’a” jedhan.
Imbaasiin Chaayinaa Israa’el keessaa Kibxata kaleessaa lammiileen ishee sababa waldhabdee biyyoota lamaaniin “yeroo gabaabaa keessatti” biyyattii gadhiisanii akka bahan dhaamteetti.
Waraanni Israa’el guyyuma kaleessaa akka jedhetti, ajajaa waraanaa Iraan olaanaa Alii Shaadmaan ajjeesuu yoo himatu, halkan tokkotti tarkaanfii haleellaa xiyyaaraa fudhateen, nama hogganaa olaanaa Alii Kaaameeniitti dhihoo ta’e, hogganaa hojjettootaa yeroo waraanaa, ajajaa waraanaa olaanaa, fi korporeeshinii waardiyyaa warraaqsaa Islaamaa fi humnoota hidhannoo Iraan lamaanuu magaalaa Teehraan keessatti ajjeesuu ibse.
Iraanis gama isheen tarkaanfii misaa’elaa Israa’el irratti fudhatteen duumessi guddaa fi aarri gurraacha gara kaaba Tel Aviv ol ka’a mul’atee jira.
