ONM-ABO Fulbaana 21, 2025
Poorchugaal Falasxiin ifatti beekamtii akka kennitu Ministeerri Dhimma Alaa Jimaata dheengadda beeksiseera. Biyya yaa’ii waliigalaa torbee dhufu gaggeeffamu dura tarkaanfii kana fudhatte keessaa isa dhumaa ta’uu ishee beeksiste.
“Ministeerri dhimma alaa Poorchugaal Mootummaa Falasxiin beekamtii akka kennitu mirkaneessite. Labsiin beekamtii seeraa Dilbata har’aa Fulbaana 21 ni kennama,” jechuun marsariitii isaa irratti ibseera. Tarkaanfiin kun konfiraansii sadarkaa olaanaa Niiw Yoorkitti gaggeeffamu dura akka ta’e hubachiiseera.
Liisboon ji’a Adoolessa keessa yaada ishee kan ibsite yoo ta’u, “jijjiirama waldhabdee garmalee yaaddessaa ta’e,” rakkoo namoomaa Gaazaa fi Israa’el irra deddeebitee doorsisa naannoo Falasxiin dabalachuu kaasuun ishee ni yaadatama.
Beeljiyeem, Faransaay fi UK dabalatee biyyoonni dhihaa biroon yaa’ii kana irratti Falasxiiniif sirnaan beekamtii ni kennu jedhamee eegama.
Pirezidaantiin Faransaay Imaanu’eel Maakroon baatii Adoolessa keessa Faransaay akka fudhattu kan dubbatan yoo ta’u, Muummichi Ministeeraa Biriteen Keyir Istaarmer ammoo yoo Israa’el haal-duree haala namoomaa Gaazaa fooyyessuuf kaayyeffate hin guunne UKn tarkaanfii akka fudhattu agarsiisaniiru.
Qorattoonni Dhaabbata Mootummoota Gamtoomanii dhiheenya kana Israa’el Gaazaa keessatti duguuggaa sanyii raawwachaa jirti jechuun xumuraniiru. Lakkoofsi namoota du’anii 65,000 ol ta’eera. Biyyoonni miseensa Dhaabbata Mootummoota Gamtoomanii gara harki sadii Falasxiiniif duraanuu beekamtii kan kennan yoo ta’u, Ayerlaandi, Ispeenii fi Noorweey bara 2024tti beekamtii kana sirnaan kennaniiru jechuun Dhaabbanni Oduu Turkii Anaadooluun gabaaseera.
