ONM-ABO Sadaasa 14, 2025
Humnoonni waraanaa Humna Deggersa Ariiftaaa Sudaan Kamisa kaleessaa haleellaa diroonii hedduu kaaba magaalaa Meroowee irratti kan raawwatan yoo ta’u, hidha guddaa lafa raayyaan ittisa biyyaa jala jiru irratti xiyyeeffachuu isaanii raayyaan ittisa biyyaa fi maddeen biroo beeksisaniiru.
Dirooniin “waajjira muummee waraanaa, buufata xiyyaaraa fi hidha Meroowee irratti xiyyeeffataniiru,” jedha ibsi waraanaa kun. Haleellaa Humnoota Deeggarsa Saffisaa (RSF) kan humna waraana Deggersa Ariifataa komatu akka addaan kute ibseera. Maddi tajaajila basaasaa irraa argame akka jedhetti, pirojektiilii torba kan dhukaafaman yoo ta’u, gaazexeessaan AFP naannoo sana jiru dho’iinsa 10 dhaga’eera.
Gama biraatiin namoonni ijaan argan dhohinsa halkan walakkaa fi barii gidduutti mudate kudhan lamaa ol lakkaa’uun, magaalattiin Kaartuum irraa gara kaabaatti gara kiiloo meetira 350 fagaattee argamtu, erga humni ibsaa guutummaatti addaan citee booda dukkana keessa akka galte himaniiru.
RSFn ji’oota darban keessa waraana itti fufee waan jiruuf dirooniitti fayyadamuun isaa dabalaa dhufeera.
Waraanni RSF kun irra deddeebiin dhaabbilee waraanaa fi siiviilii irratti xiyyeeffachuun, baatii Onkoloolessa keessa magaalaa guddoo Kaartuum fi birraa keessa teessoo mootummaa yeroo waraanaa Poort Sudaan irratti haleellaa isaanii cimsaniiru.
Dhuma Onkoloolessaa keessa RSFn naannoo bal’aa dhiha Daarfuur keessatti bakka waraanaa isa dhumaa kan ta’e al-Fashir qabachuun naannoo sana ajjeechaa balaaleffannaa addunyaa kaase qaqqabsiisuun ni yaadatama.
