ONM-ABO Ebla 26, 2024
Hidhattootni Finxaaleeyyii Amaaraa Faannoo ofiin jedhan, duula duguuggaa Sanyii irra deddeebiin waggoota lamaaf uummata Oromoo Walloo irratti taasisaa jiraniin namoonni hedduun haala gaddisiisaa ta’een ajjeefamaa, qabeenyaan saamamaa, fi manneen hawaasaa gubachuun maatii hedduun manni jireenyaa isaanii jalaa gubachuun jiruu bakkeef saaxilamanii rakkoo hamtuu keessatti argamu.
Haaluma kanaan Kaaba Oromiyaa godina Walloo aanaa Harxummaa Fursee ganda Coqorsoo Funyaan Sulleetti gaafa Ebla 23, 2024 hidhattootni Finxaaleeyyii Amaaraa Faannoon meeshaalee gurgguddaa fageenya irraa qe’ee uummataatti dhukaasaa turaniin, loon namoota 3 meeshaalee gurgguddaa hidhattootni Finxaaleeyyii Amaaraa Faannoon dhukaasaa turaniin ajjeefamaniiru.
Namoota loon isaanii humnoota badii Finxaaleeyyii Amaaraa kanaan jalaa ajjeefaman maqaan isaanii Abduu Aliyyii loon 3, Muusaa Aliyyii loon 3, Huseen Saaloo loon 2 waalumaa galatti loon 8 hidhattoota kanaan jalaa kan ajjeefaman ta’uu jiraattotni himuun, hidhattootni Finxaaleeyyii Amaaraa Faannoo kun guyyaa irraa gara guyyaatti meeshaalee gurgguddaa fageenya irraa dhukaasaa jiraniin hawaasa ba’aaf gala dhorkaa jiraachuu fi yeroon kun yeroo uummanni qonna qotatutti, namoonni hedduun ooyiruun isaanii daangaa Amaaraan waan wal daangessaniif karaa lafa isaanii qotatan dhabuun hedduu rakkachaa akka jiran dabaluun addeessaniiru.
