ONM-ABO Hagayya 6, 2024
Murni bilxiginnaa akkuma amala isaanii hawaasa Oromoo dararuu aadeffatanitti goleewwan Oromiyaa cufa keessatti hawaasa nagaa gara mana hidhaatti guuraa jiraachuun beekamee jira.
Haaluma kanaan, godina Horroo Guduruu Wallaggaa aanaa Guduruu keessatti hidhaan akkaan jabaatee itti fufee jira.
Hagayya 3, 2024 aanaa Guduruu ganda Illaammuu Xaraqoo jedhamu keessaa namootni maqaan isaanii Obbo Jabeessaa Amanuu fi Aadde Jomoree jedhaman “degartoota Waraana Bilisummaa Oromooti” jechuun badii tokko malee waajjira poolisii aanaa Guduruu magaalaa Kombolchaa keessatti argamutti hidhamanii dararamaa jiraachuu jiraattonni gandichaa eeranii jiru.
Aanichatti namoonni danuun maqaa hidhata Waraana Bilisummaa Oromoo qabdu jedhuun garmalee dararamaa jiraachuu maddeen Arrataa Biyyoolessa Oromiyaaf himanii jiru.
