ONM-ABO Fulbaana 13, 2024
Loltoonni PP fedhii isaanii malee teessuma siyaasaa koloneel Abiy Ahimed akka tiksaniif bakkoota adda addaa irraa dirqamaan qabamuun, turtii yeroo gabaabaa leenjii erga fudhatanii booda wayita dirqamaan bobbaafaman akkaataa isaaniif mijateen sirnicha ganuun baduu itti fufanii jiru.
Bifuma kanaan, miseensi Raayyaa Ittisa Impaayerattii tokko godina Baha Wallaggaa aanaa Billoo Boshee irraa hidhannoo guutuun WBO’tti harka kennatee jira.
Aanaa Billoo Boshee ganda Gala Gurree mooraa waraana bilxiginnaa bakka addaa Jimaateetti argamu irraa Fulbaana 10, 2024 miseensi Raayyaa Ittisa Impaayerattii sabaan Oromoo ta’e tokko meeshaalee waraanaa:
- Qawwee AKM Turkii -2
- Boombii F1 – 3 fi
- Rasaasa kilaashii – 340 qabachuun WBO onicha keessa socho’utti harka kennatee kan jiru yoo ta’u, Waraanni Bilisummaa Oromoos gama isaatiin simannaa ho’aa taasiseefii jiraachuu hoogganni WBO aanichaa Arraata Biyyooleessa Oromiyaatti himaniiru.
Akka loltuun kun jedhettis mooraan isaanii guyyaa irraa gara guyyaatti diigamaa akka jiruu fi wal- qoqqoodiinsi sanyummaa daran isaan gidduutti jabaachuun sanyummaan wal qoodanii walii isaanii akka ajjeesaa jiran dubbata.
Dhuma irratti, miseensi waraana bilxiginnaa kun, beekees ta’u osoo hin beekin wallaalummaa isaatiin uummata Oromoo afaan qawween dararaa ture dhiifama gaafachuun, hiriyoota isaa mooraa diinaatti hafanii lola isaan hin ilaallannetti hirmaataa jiraniin dafaa yeroon meeshaa keessan qabadhaa gara dirree haqaa kottaa jechuun dhaamsa isaa dabarseefii jira.
