ONM-ABO Onkoloolessa 29, 2024
Hoogganaan NATO Wiixata kaleessaa loltoonni Kooriyaa Kaabaa Raashiyaa keessatti bobbaafamuu isaanii ibsuun, ”gocha kana hatattamaan akka dhaaban” gaafataniiru.
Barreessaan olaanaa Maark Ruuttee akka jedhanitti, michoonni isaanii jila Rippabiliika Kooriyaa irraa dhufeen “Kooriyaan Kaabaa waraana weeraraa seeraan alaa Raashiyaan Yukireen irratti raawwattu keessatti hirmaannaa guddachaa dhufuu ishee irratti” ibsi kennameera.
Bakka bu’oonni olaanoo Tajaajila Odeeffannoo Biyyaalessaa fi Ministeera Ittisa Biyyaalessaa Kooriyaa Kibbaa ibsa kennaniin booda, “loltoonni Kooriyaa Kaabaa gara Raashiyaa ergamuu isaanii, akkasumas kutaaleen waraanaa Kooriyaa Kaabaa gara naannoo Kurskiitti bobbaafamuu isaanii mirkaneessuu nan danda’a” jedhan.
“Babal’ina waraana Raashiyaa balaa guddaa qabu” jechuun, Raashiyaa fi Kooriyaan Kaabaa “gocha kana hatattamaan akka dhaaban” gaafataniiru.
Rutteen akka jedhanitti “loltoonni Kooriyaa Kaabaa gara Kurskitti bobbaasuun isaaniis mallattoo abdii kutannaa Puutiin guddachaa jiruuti,” jechuun Pirezidaantiin Raashiyaa Vilaadmiir Puutiin “haamilee fi dandamachuu” Yukireen irratti “deggarsaa biyya alaa” barbaadaa akka jiran ibsaniiru.
Barreessaan olaanaa kun NATOn Yukireen deggarsa itti fufiinsaan akka kennu dhaadachuun “deggarsa waraanaa Yukireen daran cimsuun barbaachisaa ta’uu” irratti mariin itti fufee jira jedhan.
Jalqaba baatii kanaa Reutte waliin ibsa gaazexeessitootaaf waloo kennaniin, prezidaantiin Yukireen Volodimiir Zeleniskiin loltoonni Kooriyaa Kaabaa 10,000 humnoota Raashiyaa Yukireen keessatti lola jiran waliin ta’uu akka danda’an himaniiru.
Akka odeeffannoon basaasa Yukireen jedhutti Kooriyaan Kaabaa hojjettoota tooftaa fi qondaaltota gara naannoo Yukireen qabattee jirtutti erguu ishee odeeffannoo akka qabdu himaniiru jechuun France 24 gabaaseera.
