ONM-ABO Muddee 25, 2024
Ameerikaa fi Yunaayitid Kingidam dhiheenya kana manneen murtii waraanaa Paakistaan deeggartoota siiviilii Muummicha Ministeeraa duraanii Imraan Kaan 25 irratti murtii balleessaa bara darbe jeequmsa keessatti hirmaatan jedhaman irratti murteessuu isaaniif yaaddoo guddaa qabaachuu isaanii ibsaniiru.
Murtiin kun kanaan duras Gamtaa Awurooppaa fi falmitoota mirga namoomaa biyya keessaatiin qeeqamaa ture.
“Ameerikaan lammiileen nagaa Paakistaan mormii Caamsaa 9, 2023 gaggeeffame keessatti hirmaachuu isaaniitiin mana murtii waraanaatiin murtiin itti murtaa’uun baay’ee yaaddessaa ta’uu ibsite. Manneen murtii waraanaa kun walabummaa abbaa seerummaa, iftoominaa fi wabii adeemsa sirrii hin qaban,” jedha ibsichi. Paakistaan mirga murtii haqa qabeessaa fi adeemsa sirrii akka kabajju gaafate.
Landanitti Waajjirri Dhimma Alaa akka jedhetti “U.K.n adeemsa seeraa mataa ishee irratti abbaa biyyummaa Paakistaan kan kabajju yoo ta’u, namoota nagaa mana murtii waraanaa keessatti murtii kennuun iftoomina, qorannoo walabaa kan hin qabnee fi mirga murtii haqa qabeessa ta’e argachuu kan miidhudha jette.
Mootummaan Paakistaan dirqama Waliigaltee Mirgoota Siivilii fi Siyaasaa Idil-addunyaa jalatti qabu akka kabaju gaafanna.” Ibsi kun kan eeruun hookkara Kaan Caamsaa bara 2023 Islaamaabaaditti hidhamee booda ka’eedha. Muummichi ministeeraa duraanii kun bara 2022 paarlaamaa keessatti sagalee amantaa dhabuutiin aangoo irraa kan kaafaman yoo ta’u, malaammaltummaan Hagayya 2023tti murtiin hidhaa itti murtaa’e.
Ergasii, Kaan mana hidhaa keessa jira. Paartiin mormituu beekamaan Kaan gadhiifamuu isaa mirkaneessuuf mootummaa waliin mari’achaa jira jechuun Asoosheetid Pirees wabeeffachuun Arab News gabaaseera.
