ONM-ABO Guraandhala 8, 2025
Ji’a darbe Ameerikaan fi Aljeeriyaa waliigaltee tumsa nageenyaa yeroo jalqabaaf mallatteessan, kunis Ameerikaan dhiibbaa Chaayinaa Afrikaa keessatti guddachaa jiru qolachuuf carraaqqii cimaa taasisaa jirtuu fi yaalii Raashiyaan dantaa Ameerikaa guutuu ardii kanaatti xiqqeessuuf gootu irratti tattaaffii taasifamu cimsitee jirti.
Torban kana jilli waraanaa olaanaa Ajaja Afrikaa Ameerikaa (AFRICOM) irraa Liibiyaa daawwachuun tumsa nageenyaa saboota lamaan gidduu jiru daran cimsuuf geggeesseera.
Wiixata darbe dura taa’aan hoggantoota waliinii Ameerikaa Jeneraal CQ Biraawuun gita isaanii Aljeeriyaa waliin waliigaltee wal hubannoo kana irratti mari’achuun, dhimmoota nageenyaa, keessumaa tasgabbii dhabuu naannoo Saahel irratti xiyyeeffatan. Jeneraal Biraawuun tattaaffii farra shororkeessummaa Aljeeriyaa faarsuun, hariiroo biyyoota lamaanii cimsuuf AFRICOM waliin tumsa itti fufiinsa qabu jajjabeessaniiru.
Waliigaltichi kun akka seeraatti kan mallatteesse Jeneraal Olaanaan AFRICOM Maayikel Laangiley Amajjii 22 yoo ta’u, kunis daawwannaa sadaffaa Aljeeriyaa irratti taasisaniin ta’uun barameera jechuun Al Arabiyaan gabaasa dheeraa hojjeteen ibseera.
