ONM-ABO Waxabajjii 9, 2025
Namoonni kuma kudhaniin lakkaa’aman Dilbata hiriira mormitootaan qindaa’een Maadriiditti hiriira ba’uun mootummaa muummicha ministeeraa Peedroo Saancheez malaammaltummaadhaan himataniiru.
Mormitoonni hedduun isaanii alaabaa Ispeen diimaa fi keelloo mirmirsaa turan, addabaabayii guddaa giddugala magaalaa guddoo Ispeen keessatti argamu Pilaazaa de Ispaanaatti walitti qabamanii “Peedroo Saancheez, aangoo gadhiisi!” jechaanii turan.
Paartiin Uummataa (PP)n hiriira kana kan waame erga waraabbiiwwan sagalee miliqe miseensi paartii Soshaalistii Leyire Diyeez kutaa poolisii himannaa malaammaltummaa haadha warraa Saancheez, obboleessa isaa fi nama harka mirgaa isaa duraanii irratti dhiyaate qorate irratti duula maqaa balleessii geggeessuu isaa galmeessee booda.
Diyeez himannaa kana haaluun, Roobii darbe gaazexeessitootaaf akka himtetti, kitaaba tokkoof qorannoo gaggeessaa akka turtee fi dhaabicha ykn Saancheez bakka bu’uun hojjechaa akka hin jirre dubbatteetti. Paartii Soshaalistii Saancheez irraas aangoo gadhiisuu himteetti.
Hogganaan paartii PP Alberto Nunez Feijoo dhimma kana irratti mootummaan “gocha maafiyaa” raawwate jechuun yoo himatan, Saancheezin ammoo malaammaltummaaf “wiirtuu” ta’uu dubbataniiru.
“Mootummaan kun waan hunda xureessee jira – siyaasa, dhaabbilee mootummaa, aangoo addaan ba’uu,” jechuun hiriira kana irratti kan himan yoo ta’u, itti fufuun Saancheez filannoo dafee akka waamu gaafataniiru.
Hiriira, dhaadannoo “Maafiyaa ykn Dimokiraasii” jedhuun gaggeeffame kanarratti namoonni kuma 100 ol akka hirmaatan PPn tilmaameera jechuun AFPn gabaaseera.
