ONM-ABO Fulbaana 17, 2025
Amiir Kaataar Sheek Tamiim Bin Hamad Al-Taanii torban darbe Israa’el Dohaatti hoggantoota siyaasaa Hamas irratti haleellaa raawwatteen booda Kibxata kaleessaa dippilomaatii olaanaa Ameerikaa Maarkoo Ruubiyoo waliin tumsa ittisaa irratti mari’achuu isaanii dubbi himaan ministeera haajaa alaa Kaataar himaniiru.
“Haleellaan Israa’el kun, beekamaadha, barbaachisummaa waliigaltee ittisa tarsiimoo haaromfame nu fi Ameerikaa gidduutti saffisiisa. Kun waan haaraa miti, garuu saffisiisaa ta’uun isaa hin oolu,” jedhan dubbi himaan Majed al-Ansari daawwannaa Ruubiyoon booda ibsa kennaniin. Haleellaa Dohaa ilaalchisee waa’ee tattaaffii jiddu-galeessaa taasifamaa jiru al-Ansariin yeroo gaafataman, “Xiyyeeffannaan keenya yeroo ammaa abbaa biyyummaa keenya eeguu waan ta’eef hanga inni kun furmaata argatutti dhimmoota biroo hin ilaallu.”
Ruubiyoon haleellaan qilleensaa Israa’el hoggantoota Hamaas emiraatichaa irratti xiyyeeffate torban tokko booda Sheek Tamiim waliin wal argan. Dippilomaatiin olaanaan Ameerikaa kun, Dohaatti yeroo gabaabaaf dhaabbate, gargaartota isaa waliin marii balbala cufamee osoo hin seenin dura waajjira isaanii keessatti Sheek Tamiim waliin harka walqabate.
Ministeerri Dhimma Alaa ibsa baaseen Ruubiyoon “hariiroo cimaa biyyoota lamaanii Ameerikaa fi Kaataar gidduu jiru irra deebi’ee mirkaneesse, akkasumas Kaataar waraana Gaazaa xumuruu fi namoota booji’aman hunda gara biyyaatti galchuuf carraaqqii gooteef galateeffateera” jechuun Al Arabiya English gabaaseera.
