ONM-ABO Fulbaana 5, 2023
Murni faashistii PP humnoota garee adda addaatti moggaasee qawwee itti hidhee bobbaasuun barcuma isaa ittiin tikfachaa jiruun uummatni Oromoo qe’ee isaa irratti dararaa guddaa argaa kan jiru yoo ta’u, humnoota kanaan miidhaan uummata irratti raawwatu jabaatee jira.
Akka kanaanis godina Lixa Harargee aanaa Xuulloo araddaa Gammachiis keessatti milishootni sirna PP Dilbata dheengaddaa Fulbaana 4, 2023 barataa kutaa 12ffaa galmeef deemaa ture karaatti dhaabuun ergama deemta jedhanii erga reebanii dadhabsiisaniin booda hidhan.
Barataan osoo galmeef deemuu reebame kun Abdallaa Musxafaa yoo ta’u, reebicha hamaa irra ga’een abbaan isaa kadhatee hidhaa baafachuun baasii mataa isaan yaalchifachaa jira.
Aanaa Xuulloo keessatti milishootni ergamtoota bilxiginnaa kanneen biroo waliin ta’uun halkan halkan reebicha, saamichaa fi dhukaasaan hawaasa goolaa jiraachuu maddeen Arraata Biyyoolessa Oromiyaatti himaniiru.
