ONM-ABO Caamsaa 19, 2025
Baha Shaggar aanaa Dugdaa bulchiinsa magaalaa Maqii keessatti torban darbe irraa eegaluun jaleewwan Bilxiginnaa dargaggoota jumlaan ukkaamsanii gara mooraa leenjii waraanaatti guuraa kan jiran ta’uu maddeen Arraata Biyyoolessa Oromiyaatti himanii jiru.
Akka maddeen himanitti, magaalicha keessa sabaa fi sab-lammoonni garaa garaa kan jiraatan yoo ta’u, addatti ammoo dargaggoota Oromoo fi uummatoota Kibbaa kanneen hojii guyyaa hojjetanii of jireessuuf garas imalan irratti xiyyeeffatanii qabuun waajjira poolisii galchanii hidhuun guyyoota muraasa booda achi keessaa baasanii gara mooraa leenjii waraanaatti geessaa jiraachuu maddeeen dabaluun Arraata Biyyoolessa Oromiyaaf eeranii jiru.
Koloneel Abiy Ahimed wayita gara aangootti dhufee kaasee umurii teessuma siyaasaa isaa dheereffachuuf jecha ilmaan hiyyeessaa faayidaa dhuunfaa waanuma xiqqoo dura qabee gowwomsuun akkasumas, fedhii isaanii malee humnaan gara leenjii waraanaatti guuruun ilmaan namaa qoraan ibiddaa gochaa jiraachuun ni beekama.
