ONM-ABO Fulbaana 3, 2024
Seenaa qabsoo riphee loltoota addunyaa kanaa keessatti warreen bilisummaa saba isaaniif qabsaa’aa turan, akkasumas duula abbootiin irree riphee loltoota dhabamsiisuuf taasisaa turan keessatti mul’atee kan hin beekne, murnoonni bilxiginnaa maatii qabsaa’otaa ajjeesuu, hidhuun maallaqa guddaa gaafachuu fi saamuu bira darbanii midhaan nyaataa hawaasaatti illee summii naquun gochoota suukkanneessaa argaa fi dhageettiitti hin tollee fi dubbachuuf illee nama qaanessan guyyuu uummaticha irratti raawwachuu itti fufaniiru.
Kaaba Oromiyaa godina Walloo aanaa Jiillee Dhummuuggaa ganda Hiddaa fi Dhaddachaa keessatti Hagayya 29, 2024 waraanni fi milishoonni murna nama nyaataa PP waliin ta’uun maqaa sakattaa WBO jedhuun qe’ee maatii qabsaa’otaa keessa naanna’anii erga manaa ari’aniin booda balbala namootaa caccabsuun ol seenanii maallaqa, uffannaa fi meeshaalee adda addaa saamuun, wantoota achii hin sochoone ammoo achumatti caccabsuu fi midhaan facaafamee margee jirus buqqisuun daakuu fi wantoota nyaatamutti summii naqanii deemuu jiraattotni gamasii ibsaniiru.
Akka jiraattotni jedhanitti hidhattootni Bilxiginnaa uummata nagaa akka goolaniif qe’ee jiraattotaatti bobbaafaman kun warreen ganda Hiddaa fi Dhaddachaa maatii qabsaa’otaatii fi deeggartoota WBO’ti, akkasumas WBO naannoo kana fidanii nu rukuchiisaa jiru waan ta’eef, kunuu itti xiqqaata, sichi tarkaanfii lubbuu irratti fudhanna jechuun dhaadachaa turuu isaanii dabaluun ONM himaniiru.
