ONM-ABO Muddee 9, 2024
Hogganaan mormituu Israa’el Yayir Lapid kufaatii sirna Bashar al-Asad Siiriyaa keessatti hordofee tasgabbii dhabuu naannoo sanaa furuuf tumsi naannoo akka uumamu Dilbata kaleessaa gaafate.
Asaad gareewwan farra sirnichaa Dilbata ganama magaalaa guddoo Damaasqoo erga to’atanii booda gara bakka hin beekamnetti kan baqate yoo ta’u, kunis kufaatii sirna Paartii Baath kan bara 1963 irraa eegalee Siiriyaa keessatti aangoo irra ture agarsiisa.
Gareen farra sirnichaa magaalaa guddittii kaaba Siiriyaa Aleeppoo erga to’atanii torban tokko booda jechuun ni danda’ama.
“Taateewwan Siiriyaa keessatti mudatan keessatti, tasgabbii dhabuu naannoo waliin wal’aansoo qabuuf, Sa’uudii Arabiyaa fi biyyoota waliigaltee Abrahaam waliin, gamtaa naannoo cimaa uumuun yeroo kamiyyuu caalaa barbaachisaa dha,” jechuun Lapid akkaawuntii X isaa irratti dubbateera.
Waliigaltee Abrahaam kan Ameerikaan gidduu galeessa godhate yoo ta’u, biyyoonni Arabaa afur Emireetota Arabaa Gamtoomanii (UAE), Baahireen, Sudaan fi Morookoo bara 2020tti Israa’el waliin hariiroo dippilomaasii uumuun isaanii ni yaadatama.
Qondaaltonni Israa’el yeroo dheeraaf hariiroo Sa’uudii waliin qaban idileessuuf yaalaa kan turan yoo ta’u, Riyaad garuu hariiroo kan uumtu erga Israa’el waggoota kurnaniif lafa Falasxiin qabattee turte xumurtee booda qofa jetteetti.
“Gareen Iraan haalaan laafaa dhufeera, Israa’el bu’aa siyaasaa bal’aa kan Gaazaa,Yihudaa fi Samaariyaa (West Bank) keessattis ishee gargaaru argachuuf carraaquu qabdi,” jedhan Lapid jechuun associated Press gabaaseera.
