ONM-ABO Gurraandhala 26, 2025
Ganna ganna maqaa jijjiirama qilleensaa to’achuuf biqilaa dhaabna jedhanis, dantaa siyaasa isaaniif waraana isaaniin bosona mancaasuu fi warshaalee qe’ee hawaasaa keessatti gadi dhaabsisuun jijjiirama qilleensaa uumameen gaaga’amni beeyladoota, bineeldotaa fi jireenya uummataa irratti mudataa jira.
Haaluma kanaan jijjiirama qilleensaa fi faalama bishaanii Baha Shaggar aanaa Adaamaa keessatti mudateen gaalotni 48 lubbuun darbuu jiraattotni ibsan.
Aanicha keessatti warshaan bulchiinsa aanaa Adaamaa fi Lumee Edduu ganda Joogoo Gudeeddootti argamu keessaa summiin warshicha keessaa ba’u bishaan naannoo faaluun gaalli aanaa Fantaallee irraa garas deemtu bishaan kana dhuguun guyyaadhaa guyyaatti du’aa jiraachuun ibsameera.
Keessattuu ganda ilmaan Dhuccee fi Qarsee irra caalmaatti lubbuun darbaa jiraachuun kan himamu yoo ta’u, lubbuu bararuu fi gaaga’amni kana caalu akka hin mudanneef yaaliin bulchiinsa warshichaa fi ogeessota fayyaa beelladaa aanichaan geggeeffamu kan hin jirre ta’uun ifoomeera.
Jalqaba irrattis, Gaalli bishaan summaaye kan warshaa ganda Qobbo’oo Luuxoo keessatti argamu jalaa yaa’u fi bakka Furdisa horii mataa magaalaa Adaamaa gubbatti argamu jalaa yaa’uun bakka tokkotti kuufame dhugee achirraa dhumuus himuun, hanga gabaasni kun qindaa’etti du’aa jiraachuu fi yaaliin lubbbuu oolchus karaa murna PP kennamaafii akka hin jirres jiraattotni dabaluun himaniiru.
Uummanni miidhaan qabeenya isaanii irra ga’aa jirus waajjirri eegumsa fayyaa horii kan Adaamaa fi aanaa Fantaallee addatti itti siqeenyaan dirmannaa uummata kanaa godhanii qabeenya uummata kanaa akka baraaranii fi bishaan summaa’aa horii kana fixe, ammas horiin biraa akka hin fayyadamnee fi qaamni abbummaan qabeenyi warshaa fi furdisa horii bishaan summaa’aa gadi lakkisaa jiru itti gaafatamummaa akka fudhataniif qaamni dhimmi ilaalu akka nuuf hordofu jechuunis dhaamsa isaanii dabarfatanii jiru.
