ONM-ABO Ebla 29, 2025
Ilmaan Oromoo dirqiin irree isaatti fayyadamuun afaan qawween ukkaamsee bututtuu impaayera Itiyoophiyaa tiksuuf jecha soora rasaasaa gochuu fi uummata Oromoo duguugee balleessuuf leenjii waraanummaa kenneefii bobbaasaa kan jiru murni badii PP, ta’us saamtonni waraana isaa rasaasa WBO’n harca’aa kan jiranii fi kanneen Oromummaa isaanii hubatan balfamaa mooraa waraana sirnichaa keessaa hidhannoo guutuun baduu ittuma fufuun aanaa Daarimuu irraa loltoonni sirnichaa 3 bahuun WBO’tti harka kennachuun barameera.
Loltoonni sirnichaa duraanii harka kennatan kunneenis dirqiin qabamanii leenji’uu ibsuun akkasumas waraanni sirnichaa isaan keessaa miliqan guyyuu dararaa ilmaan Oromoo irratti bobbaa’anii jiraachuu kaasuun kanaan duras cubbamaa sirna PP’f qawwee baatanii tajaajilaa turuutti dhiifama gaafachuun hiriyoota isaanii dirqiin mooricha keessatti hafanii jiraniinis, osoo yeroon jirtuu saba keessan kan dararaa jiru PP’f ergamuu dhiisaatii hidhannoo keessan waliin gaachana uummata Oromoo kan ta’e WBO’tti makamaa Oromiyaaf falmadhaa jechuun dhaamsa dabarsaniifii jiru.
Guyyaa guyyaatti raafamaa fi diigumsa keessatti kan argamu mooraan waraana murna Bilxiginnaa kan kanaan duriin olitti yeroo ammaa kana tarkaanfii WBO’n irratti fudhachaa jiruu fi keessaa baduu loltoota isaa irraa kan ka’e yaaddoo fi mancaatii guddaa keessa galee jiraachuu miseensonni loltuu impaayerattii harka kennatan kunneen ONM’tti himanii jiru.
