ONM-ABO Waxabajjii 1, 2025
Godina Baalee Bahaa aanaa Gololchaa ganda Anubaa Harar jedhamu keessatti sababa hanqina bu’uuraalee misoomaan uummatni miidhama ulfaataa keessa jiraachuu Arraatni Biyyoolessa Oromiyaa odeeffate.
Godinichatti gandi Anubaa Harar magaalaa Jaarraa irraa kiilomeetira 4 qofa fagaatee kan argamu yoo ta’u, kenniinsi tajaajila geejjibaa jiraattotaaf bu’aa buusuu danda’u dhibuu irraan kan ka’e hawaasni gandichaa rakkoolee adda addaaf saaxilamaa jiraachuu jiraattonni dabaluun ifoomsanii jiru.
Akka jiraattonni gandichaa yaada isaanii ONM’f qoodan ibsanitti rakkooleen hanqina daandii geejjibaan nu mudatan hedduu ta’anis kanneen keessaa muraasa yoo kaasne, namni dhukkubsate baatamee gara buufata fayyaa deemuutu jira, haawwan da’umsaaf deeman yeroo ciniinsifatan gargaarsi ambulansii hatattamaan qaqqabee buufata geessuuf daandiitu barbaachisa, kun ammoo hin jiru jechuun komii qaban ibsataniiru.
Xumura irrattis rakkoon keenya kan akka salphaatti ilaalamu osoo hin taane dhimma lubbuuti waan ta’eef ammatti furmaata akka nuuf argatu qaamni dhimmi isaa ilaallatu itti gaafatama akka fudhatu jechuun dhaamsa isaanii dabarfatanii jiru.
