ONM-ABO Muddee 31, 2025
Godina Horroo Guduruu Wallaggaa aanaa Guduruu ganda Reef-Tokko – Taanee jedhamu keessatti Muddee 28, 2025 waraanni murna Bilxiginnaa nama maqaan isaa Obbo Jirraa Daffaar jedhamu abbaa ilmaan torbaa kan ta’e badii tokko malee hidhanii hiraarsaa jiraachuu jiraattotni Arraata Biyyoolessa Oromiyaatti himan.
Akka jiraattotni himanitti Obbo Jiraan abbaa ijoollee torbaa hojii qonnaa irratti bobba’uun maatii isaa jiraachifatu yoo ta’u, waraanni PP garuu maqaa sobaa itti moggaasuun yakkanii hidhuun hiraarsaa jiraachuu itti dabaluun dubbatu.
Murni Bilxiginnaa dabaa fi cubbuun guutamuun uummata nagaa irratti yakkoota garaagaraa raawwachuun qe’ee fi qabeenyaa isaa irratti waraana isaa itti bobbaasee goolaa jiraachuun ni beekama.
