ONM-ABO Waxabajji 17, 2023
Ilmaan Oromoo Oromummaan yakkee hidhuu fi ajjeesuun qabsoo uummata bal’aan geggeeffamaa jiru laamshessuu fi duubatti harkisee bu’aa siyaasaa irraa sharafachuuf, karooraa fi sagantaa qindoomina qabuun hojjechaa turus, ajjeechaa akkasumas gidiraan ilmaan Oromoo saalaa fi umuriin osoo adda hin qoodin taasifamu kasaara malee bu’aa argamsiiseef hin qabu.
Murni badii isaa irraa barachuu hin dandeenye bilxiginnaan dararaa ilmaan Oromoo irraan ga’u itti fufuun godina Horroo Guduruu Wallaggaa aanaa Jimmaa Raaree ganda Babal’aa keessatti dheengadda waxabajji 14, 2023 maqaa sakatta’iinsa Waraana Bilisummaa Oromoon bobbaa taasisaniin qonnaan bulaa tokko qabanii hidhuun, qabeenya isaas saamuu maddeen gabaasan.
Qonnaan bulaan waktii qonnaa kanatti yeroo itti hojii qonnaatti bobba’uun jiruu fi jireenya isaa egereef tattaafatutti obbo Abdiisaa Xannaa qabeenya isaa saamanii isaas mana hidhaatti darbachuun dararaa jiru.
Namni obbo Abdiisaa Xannaa jedhamu kun nama siyaasa kam keessattiyyuu hirmaatee hin beeknee fi uummata naannoo isaa birattis jaallatamummaa akka qabu maddeen dabaluun ibsuun sababa inni hidhaatti darbatameef maatiin rakkachaa jiraachuu himaniiru.
