ONM-ABO Adoolessa 31, 2023
Dheengadda Adoolessa 29, 2023 mootummaa Naannoo Gambeelaa magaalaa Gambeelaa bakka Gonder Safer jedhamuun beekamutti ilmaan Oromoo gosoota Anyuwaakiin cubeen waraanamuun tokko yoo du’u tokko madaa’eera.
Waraansa cubeen gosoota Anyuwaak kanaan dargaggoota Oromoo lama irratti raawwateen kan ajjeeffame Daagim Addunyaa yoo ta’u, kan madaa’ee hospitaalatti yaalamaa jiru ammoo Karrasaa Tashoomee ta’uun barameera.
Magaalaa Gambeelaa kana keessatti ajjeechaan ilmaan Oromoo irratti qaamota hidhatee socho’uu fi gosoota naannichaan raawwatu hammaatee kan itti fufee dha.
Dargaggoonni Oromoo lamaan kunis barattoota yuuniveersitii Gambeelaa kan baratan yoo ta’u guyyaa Sanbataa boqonnaaf ba’anii nyaata fayyadamuuf gara bakka sanaatti akka imalanii fi achittis gochi hin eegamne irratti raawwachuu hiriyootni isaanii miira gaddaan Arraata Biyyoolessa Oromiyaatti himaniiru.
