ONM-ABO Onkoloolessa 25, 2023
Ministirri Ittisaa Chaayinaa Li Shaangfuu Kibxata kaleessaa erga ija uummataa jalaa badee ji’a lama booda hojii irraa ari’amuun, ministeera olaanaa dhiheenya kana ibsa tokko malee hojii dhaabe isa lammaffaa ta’eera.
Liin miseensa Koomishinii Waraana Giddugaleessaa – qaama humna guddaa qabu kan hogganaan Chaayinaa Shii Jinpingiin durfamu humna waraanaas ajaju, akkasumas miseensota mana maree naannoo Chaayinaa shanan keessaa tokko ta’uun – kaabinee keessatti iddoo olaanaa sadarkaa ministeera idilee qabu keessaas ari’atamuu miidiyaan mootummaa Chaayinaa CCTV’n gabaaseera.
Murtee kana koree dhaabbataa mana maree seera baastuu chaappaa biyyattii, Koongireesii Uummataa Biyyaalessaatiin raggaasifamuu isaa CCTVn kan gabaase yoo ta’u, koreen kun nama Lii bakka bu’e tokkollee hin kaasne.
Ji’a Bitootessaa keessa ministeera ittisaa ta’uun kan muudaman Liin dhuma baatii Hagayyaa irraa eegalee ummata duratti kan hin mul’anne yoo ta’u, kunis hiree isaan eeggatu irratti tilmaama cimaa kaasuun isaa ni yaadatama.
Dhabamuun Jeneraalichaa, baatii Adoolessaa keessa Ministirri Dhimma Alaa duraanii Qin Gang haala ajaa’ibaa ta’een aangoo irraa kaafamuu fi ibsi itti kennamuu dhabuu dabalatee, raafama hojjettoota sadarkaa olaanoo biyyattii jeeqe hordofeeti.
Qin Kibxata darbe miseensa mana maree kutaa biyyattii irraa kaafamuu isaanii CCTV gabaaseera.
Ministirootni olaanoo lama saffisaan wal duraa duubaan dhabamuu fi hojiirraa ari’amuun isaanii bulchiinsa Shii irratti gaaffii kan kaase yoo ta’u, gochi kunis aangoo walitti qabuu fi naamusa dhaabaa cimaa kabachiisuun sirna siyaasaa Chaayinaa daran ifa akka hin taane taasiseera.
Shiin nageenya biyyaalessaa cimsuuf duula taasifamus cimsuun balaa fi saaxilamummaa Paartii Koominiistii biyya bulchaa jiru irratti mul’atu kamiyyuu dhabamsiisuuf jecha tarkaanfii kana fudhachaa jiraachuu ibsuun, gocha kanas kan raawwachaa jiran yeroo waldhabdeen biyyoota dhihaa waliin dabalaa dhufe keessatti.
Li’n aangoo irraa kaafamuun isaa, mariin waraanaa sadarkaa olaanaa Chaayinaa fi Ameerikaa gidduutti akka deebi’ee jalqabuuf daandii guddaa cufuun dubbatamaa jira.
Liin bara 2018 Chaayinaan meeshaa waraanaa Raashiyaa bitachuu isheetiin US Ameerikaan qoqqobbiin irra kan kaa’ame yoo ta’u, Beejiing qoqqobbiin kun yoo haqame malee barreessaan ittisa Ameerikaa Lii waliin walgahii akka hin arganne irra deddeebitee yaada dhiheessuu gabaasa bal’aa CNN kaleessa qabatee ba’e ni addeessa.
