ONM-ABO Sadaasa 26, 2023
Akka jiraattotni godina Qellem Wallaggaa magaalaa Dambii Doolloo nuuf himanitti kaleessa Sadaasa 25, 2023 toora sa’a 9:00 irratti hidhattootni murna maafi’aa PP maqaa milishaa jedhu maxxanfatanii deeman namoota nagaa gabaa guddaa godinichaatti waa daldalachuu fi bitachuuf ba’an irratti sababa tokko malee rasaasa itti dhukaasaniin namootni 4 madaa’uun hospitaala Dambii Doolloo seenuun kan barame yoo ta’u kanneen rasaasa dhukaafame dheessuun boolla seenanii fi wal miidhanis hedduu ta’uun ibsaniiru.
Tarkaanfii akka feete hidhattootni faashistii PP fudhatan kanaan magaalaa Dambii Doolloo keessatti namootni miidhamanii hospitaala jiran Lalisee Dibaabaa aanaa Sayyoo ganda Miinkoo, Lalisee Kennaa Bulchiinsa Magaalaa Dambii Doolloo ganda 05, Hundattuu Heenok Bulchiinsa Magaalaa Dambii Doolloo ganda 04 fi Meskerem Yohaannis Bulchiinsa Magaalaa Dambii Doolloo ganda 05 ta’uu barameera.
Tarkaanfiin kun gabaa walakkaatti ta’uun miidhaan kun akka haammatu kan taasise yoo ta’u, akka hawaasni magaalaa Dambii Doolloo jedhanitti milishaan tarkaanfii kana fudhate yeroo inni milishaa hin ta’in namaaf ergamaa ture intala tokko jaalalaaf gaafatee sababa diddeef guyyaa gabaa kana humnaan dirqisiisuuf yaalii taasisus hin milkoofne.
Kana irraa ka’uun fedhii dhuunfaa isaaf namoota toora sana irraa biqila gurguraa turan rasaasaan rukuchuun akka miidhe odeessi achii nu ga’e ni addeessa.
