ONM-ABO Muddee 8, 2023
Finxaaleyyiin Amaaraa yeroo garaa garaatti Godina Horroo Guduruu Wallaggaa fi Wallagga bahaa keessatti uummata nagaa ajjeesaa, qe’ee irraa buqqisaa fi qabeenya uummataa saamaa akka turan irra deddeebiin gabaasaa turuun keenya ni yaadatama.
Gochuma kanaanis, Guyyaa kaleessaa jechuun Muddee 7, 2023 Godina Horroo Guduruu Wallaggaa Aanaa Jaardagaa-Jaartee Ganda Dargee Kootichaa iddoo addaa Caatoo jedhamutti finxaaleyyiin Amaaraa nama maqaan ishee aaddee Kumashii Dhugaasaa jedhamtu irratti ajjeechaa raawwachuu jiraattotni himan.
Aaddee Kumashiin dubartii hojii qonnaa naannicha keessatti hojjechuun of jiraachiftu yoo taatu, Guyyaa kaleessaa buna funaannachuuf ilma ishee Kennaa jedhamuu fi nama maqaan ishee Warqii jedhamtu waliin gara bosona Caatootti deemaa osoo jiranii finxaaleyyiin Amaaraa dubartii kana irratti ajjeechaa raawwachuun, ilma ishee Kennaa jedhamu kanaa fi nama Warqee jedhamtu kan waliin turan ammoo achi buutee dhabamsiisuu jiraattotni bakkichaa Arraata Biyyoolessa Oromiyaatti himan.
