ONM-ABO Caamsaa 27, 2024
Godinichatti maatii qabsaa’otaa karaa adda addaan dararuun kan beekamu waraanni impaayera Itoophiyaa, aanaa Lataa Sibuu ganda Amuumaa Alaltuutti “ilma keetu bosona jira” jechuun nama maqaan isaa Obbo Huseen Angaree jedhamu gaafa Caamsaa 24, 2024 halkan mana isaatii gadi waamuun rasaasa itti roobsanii ajjeesan.
Obbo Huseen maatii harka qalleessa gaafa ta’u, sababa ilmi isaa WBO keessa jiru qofaaf du’uu isaa jiraattonni gandichaa himanii jiru.
Dabalataanis, aanaa kanatti waraanni faashistii Abiy Ahimediin durfamu jiraattota hojii dhuunfaa isaanii hojjetan qabanii akkuma gara leenjii waraanaatti guuraa turan, yeroo ammaa kanas ganda Inimaayii Somboo irraa barattoota sadarkaa tokkoffaa baratan humnaan qabanii gara leenjii waraanaatti ergaa jiru.
Gaafa Caamsaa 20, 2024 ganda kana irraa “biyya keessaniif loltu” jechuun irratti dhukaasa bananii barattoota maqaan isaanii: Abdii Daangilaa, Abdii Waaqtolaa fi Abdii Abbayyaa jedhaman qabanii mana barumsaa addaan kuchisiisuun gara leenjii waraanaatti erguun himameera.
