ONM-ABO Waxabajjii 2, 2024
Madda jeequmsaa kan ta’e waraanni faashistii Abiy Ahimed guyyaadhaa gara guyyaatti uummata nagaa rasaasaan rukutuun gariin ajjeesaa fi gariin ammoo qaama hir’uu taasisuun qe’ee uummatichaas saamee, irraas godaansisaa jira.
Haaluma kanaan Lixa Wallaggaa aanaa Lataa Sibuu ganda Amuumaa Gorgisii jedhamu keessatti, waraanni akeekaaf kaayyoo deemuuf hin beeknee fi Abiy Ahimed qofa aangoo irra tursuuf bobbaafaman kun toora sa’a 3:00’tti barataa Eliyaas Beekamaa jedhamu rasaasa itti roobsanii miilla irra rukutuun du’aa fi jireenya gidduutti argama.
Eeliyaas Beekamaa nama tuttuqaa siyaasaa kam keessaa illee hin qabne daa’ima ganna 15 fi barataa kutaa 8’ffaa kan ta’e yoo ta’u, mana namaa taa’ee kan baratu ture. Yeroo ammaa buufatni fayyaa aanaa Lataa Siibuu dadhabuun gara hospitaala Najjootti dabarsanii jiru.
Gochi Kun irra deddeebiin aanuma Lataa Sibuu keessatti raawwachaa kan jiru yoo ta’u, Caamsa 31, 2024 nama Umar Baqqalaa jedhamu miilla irra rukutuun hospitaala Baabboo Gambeelitti yaalaamaa jiraachuu gabaasuun keenya ni yaadatama.
