ONM-ABO Adoolessa 9, 2024
Jiraattonni godina Horroo Guduruu Wallaggaa aanaa Sulula Finca’aa naannoo warshaa sukkaaraa jiran waraana goolessaa PP’n hojii qonnaatti ba’anii akka hin dalaganneef ugguramuun hiraarfamaa jiraachuu himan
Dararaa fi doorsisni jabaan jiraattota godina Horroo Guduruu Wallaggaa aanaa Sulula Finca’aatti jabaachuun kan himame yoo ta’u, namni kamuu bakka hojii isaatti argamnaan rasaasaan rukutamee akka du’u murteen garee badii bilxiginnaan irratti darbee jiraachuu ibsu.
Addattuu maatiin qabsaa’otaa ilmaan isaanii Waraana Bilisummaa Oromoo fi Qeerroo Bilisummaa Oromoo keessa jiran waraanni faashistii PP gochoota gara jabummaa adda addaa irratti fudhachaa kan jiru yoo ta’u, namoota kana irratti dararaa jabeessuun lageen keessa ari’anii qabuu reebicha irratti raawwachuu, hidhuu fi qe’ee jalaa barbadeessuu raawwachaa jiru.
Namoonni lakkoofsaan hedduu ta’anis qe’ee fi qabeenya isaanii irraa buqqa’aniiru.
Walumaagalatti jiraattonni godina Horroo Guduruu Wallaggaa waqtii oomisha midhaaniitti dararaa argaa jiraniin haalli egeree maatii isaanii yaaddessaa ta’uu ONM’f yaada isaanii qoodaniiru.
